Иректән мәхрүм ителгән хатын-кызларны төрмәдә дин тотуга бәйле сораулар борчый

Бүген Татарстан мөфтие Камил хәзрәт Сәмигуллин хатын-кызларның Чувашиядәге Козловка шәһәрендә урнашкан 5 нче төзәтү колониясендә булды. Тоткыннар белән шулай ук аның урынбасары Илдар хәзрәт Баязитов, Җәзаларны үтәү буенча федераль хезмәтнең Татарстандагы идарәсе башлыгының дин тотучылар белән эшне оештыру буенча ярдәмчесе Рафаил Дәүлиев, Чувашия мөселманнары Диния нәзарәтенең “Гөлистан” мәдрәсәсе ректоры Наил хәзрәт Җамалетдинов очрашты.

БӘЙЛЕ
2017 Мар 16. Фото:dumrt.ru

Дин әһелләре колониядә тоткыннар өчен тудырылган шартлар белән танышты, намаз бүлмәсендә, китапханәдә булды. Бу намаз бүлмәсенә егермеләп тоткын хатын-кыз йөри. Китапханә фондында 12,5 мең китап бар. Татарстан мөфтие китапханәгә “Хузур” нәшрият йортында бастырылган дини китапларны һәм ТР мөселманнары Диния нәзарәте чыгарган 12 комплект Коръән бүләк итте.

Моннан тыш мөфти тоткыннарга дини кыйммәтләр хакында сөйләде. Исламның төп дини гыйбадәтләрен аңлатты. Тәүбәгә килү һәм Аллаһы Тәгаләнең кичерүе хакында вәгазь сөйләде. Рухи яктан нык, әхлаклы булырга һәм тормыш авырлыкларына бирешмәскә чакырды.

Иректән мәхрүм ителгән хатын-кызлар сорауларны күп бирде. Алар төрмәдә дин тотуга кагылышлы иде. Камил хәзрәт киләсе юлы аларга Коръәннең 12 нче сүрәсен тәфсир кылырга вәгъдә кылды. Анда сүз Йосыф пәйгамбәрнең Мисыр хакиме хатыны гаепләве аркасында берничә ел төрмәдә утыруы турында бара.

Козловка төрмәсендә Чувашия, Татарстан, Башкортостан һәм башка төбәкләрдән 800ләп хатын-кыз утыра. Шуларның 77 се - Татарстаннан.

Төрмәләр белән эшләү - Татарстан мөселманнары Диния нәзарәтенең өстенлекле эш юнәлеше. Җәзаларны үтәтү федераль хезмәте белән берлектә даими рәвештә ислам буенча вәгазьләр сөйләнелә, Коръән уку буенча конкурслар, дини бәйрәмнәр уздырыла. Моннан тыш нәзарәт төрмәләрне Хәнәфи мәзхәбе китаплары белән тәэмин итә. Шулай ук төрмәләрдә атна саен имамнар тоткыннар белән очраша. ТР мөселманнары Диния нәзарәте инициативасы һәм Җәзаларны үтәү буенча федераль хезмәт ярдәме белән Татарстанның барлык төзәтү учреждениеләрендә мәчетләр һәм намаз бүлмәләре эшли, Рамазан аенда хәләл туклану оештырыла, дип хәбәр итәләр мөфтиятнең матбугат хезмәтеннән.


Комментарийны калдырыгыз
avatar

Авг 13
Авг 08
Авг 02
Июл 16
Июл 03
Июн 27
Май 22
Май 18
Май 17
Май 14
Май 14
Май 07
Май 01
Апр 19
Апр 12
Апр 11
Фев 14
Фев 05
Янв 15
Дек 26

40 тартма
Дин
Мәкаләләр


Вакыйга

Май 07

Май 10

Фев 09

Янв 11

Янв 06

Әңгәмәләр
© 2009-2020 "Татар Ислам" мәгълүмат агентлыгы
Сайтка куелган язмаларга барлык хокуклар «Ислам info» медиа-төркеменә карый. Материаллардан файдаланганда гиперсылтама ясау мәҗбүри. Массакүләм мәгълүмат чарасын теркәү турындагы таныклыгы: ИА № ФС-77-45782 13. 07 2011 ел. Элемтә, мәгълүмати технологияләр һәм массакүләм коммуникацияләр өлкәсендә күзәтчелек буенча федераль хезмәт (Роскомнадзор) тарафыннан бирелгән. Урнаштырылган материал 18+. т.8 927 242 35 78
Сайтлар ясау һәм сайт белән идарә итү — «Ариф» студиясе