Татарстан дин әһелләрен Ханты-Манси автономлы округы мөфтие Таһир хәзрәт Саматов каршы алды. Таһир хәзрәт кунакларны – мөфти Камил хәзрәт Сәмигуллинны, баш казый Җәлил хәзрәт Фазлыевны, мөфти урынбасары, РИИ ректоры Рәфыйк Мөхәммәтшинны, Ислам кабул итүгә 1000 ел мәдрәсәсе директоры Ильяс хәзрәт Җиһаншинны һәм башка дин әһелләрен Сургуттагы Җәмигъ мәчете белән таныштырды.
Аннары хәзрәтләр Ханты-Манси автономлы округы - Югра мөселманнары Диния нәзарәте мәҗлесенә җыелдылар. Мәҗлес мәчеттә узды. Биредә Камил хәзрәт Сәмигуллин җирлектәге дин әһелләрен сәламләп чыгыш ясады. Ул үзенең чыгышында ТР мөселманнары Диния нәзарәте һәм Ханты-Манси автономлы округы мөселманнары Диния нәзарәте арасында күптәннән нәтиҗәле хезмәттәшлек, җылы мөнәсәбәтләр урнашуын билгеләп узды. Әлеге мәҗлестә ике дини оешма арасында хезмәттәшлек итү турында килешү төзелде. Килешүгә Татарстан мөфтие Камил хәзрәт Сәмигуллин һәм Ханты-Манси автономлы округы мөфтие Таһир хәзрәт Саматов кул куйды. Бу хакта Татарстан мөфтияте матбугат хезмәте хәбәр итә.
Бүген Сургут шәһәрендә “Себер шартларында яшьләрне берләштерүдә ислам традицияләренең һәм кыйммәтләренең роле” - "Роль и значение исламских традиций и ценностей для социализации молодежи в условиях Сибири" дип аталган конференция узды. Татарстан мөфтие “Исламда традицияләр һәм яңалыклар: җәмгыять, мәдәният, шәхес» дигән темага чыгыш ясады.