Казан Кремлендә “Эрмитаж-Казан” үзәгендә “Инанырга һәм белергә” дип исемләнгән программа, алдан хәбәр иткәнчә, 5-6 сентябрь көннәрендә түгел, ә 6 сентябрьдә генә күрсәтеләчәк. Бүген “Эрмитаж-Казан” үзәгендә кинофильмнарның көндезге сәгать 11дән 12гә кадәр барачагын әйттеләр.
Әлеге программа режиссер Али Абдулсәлимовның “Үксез” фильмын (Россия), Саррураның “Өйләнешербез... Әгәр Аллаһ теләсә” фильмын (Тунис), Зөфәр Хәйруллинның “Аллаһ ихтыяры буенча” фильмын (Татарстан), Вилүрә Исәндәүләтованың “Тәүбә” фильмын (Башкортостан), Рудамир Абдулинның “Имам” фильмын (Россия), Франсуа Конденың “Тынычлык дине. Ислам” фильмын (Беларусь), Алексей Китайцевның “Иман” фильмын (Россия) тәкъдим итә.
Ислам дөньясындагы күренекле шәхесләргә багышланган картиналарны да бу программа кысаларында карап булачак. Казанның Кабан арты мәчетенең милли җанлы имамы Исхак Лотфуллинга багышланган “Исхак хәзрәт Лотфуллин. Хезмәттә узган гомер” дип аталган фильмны режиссер Ренат Хәбибуллин төшергән. Алексей Китайцевның “Патшаларга кылыч. Фәрит Сәйфел-Мөлеков” дигән картинасы Үзбәкстанда туып үскән татар, халыкара аренада танылган журналист, Көнчыгышны өйрәнгән белгеч Фәрит Сәйфел-Мөлеков турында бәян итә.
Римма Гатина.