Россия мөслимәләр берлеге рәисе Наилә ханым Җиһаншина җитәкчелегендә узган әлеге "түгәрәк өстәл"дә хәзерге заман мөслимәләренең образы һәм киеме, аларның җәмгыятьтәге урыны һәм иҗтимагый активлыгы турында фикер алышу булды. Чара кысаларында яулык һәм төрбән бәйләү, көндәлеккә кия торган кием комплектларын сайлау буенча мастер-класслар оештырылды.
Мәгълүм булганча, Халыкара хиҗап көне 2013 елдан бирле үткәрелә, Бу инициатива белән Нью-Йоркта гомер кичерүче Нәзмә Хан чыккан. Гадәттә бу көнне дөньяның төрле почмакларында акцияләр үткәрелә. Бүген бу уңайдан социаль челтәрләр кулланучыларына хиҗап киеп фотога төшәргә һәм аларны #ЯсолидарнасВами, #Hijabday, #WHD2017 хештеглары белән бастырырга тәкъдим ителә, дип хәбәр салды Татарстан мөфтияте матбугат хезмәте.