Татарстан Республикасында әлеге комиссиягә 12 кеше кертелде. Аларга бүген таныклыкларны ТР Иҗтимагый палатасы рәисе Алексей Фомин тапшырды, җиңел булмаган эшләрендә рух күтәренкелеге һәм ныклык теләде.
Алар арасында Татарстан мөфтие урынбасары, “Ярдәм” мәчете имам-хатыйбы, “Ярдәм” милли ислам хәйрия фонды идарә советы рәисе Илдар хәзрәт Баязитов, “Ярдәм” милли ислам хәйрия фонды президенты Илһам Исмәгыйлев, ТР Иҗтимагый палатасы, Җәзаларны үтәү буенча федераль хезмәтнең ТРдагы идарәсе карамагындагы иҗтимагый советы әгъзасы, “Социаль тернәкләндерү һәм адаптация үзәге” коммерцияле булмаган автоном оешмасы җитәкчесе Азат Гайнетдинов бар.
Шулай ук исемлектә Зарипов Альберт Якубович, Карпухин Кирилл Алексеевич, Клюков Василий Дмитриевич, Савва Арсен Владимирович, Расческова Лариса Владимировна, Семин Георгий Геннадьевич, Тимофеев Николай Иванович, Основ Михаил Федорович һәм Хисамов Рамил Иршатович бар.
Татарстанда эшләүче комиссиянең бу чакырылыштагы составы 70 процентка яңартылган. Комиссия әгъзалары, мөрәҗәгатьләр нигезендә, Җәзаларны үтәү буенча федераль хезмәтнең ТРдагы идарәсе яки Эчке эшләр министрлыгына караган объектларда тоткыннарны тоту шартлары тиешле дәрәҗәдә булуны һәм кеше хокукларын саклауны контрольдә тотачак. Республиканың төзәтү учреждениеләрендә тотылучылар иреккә чыккач та, дәүләт органнары белән берлектә аларга тыныч тормышка җайлашырга, эшкә урнашырга ярдәм итәчәк.
Бүген комиссиянең беренче оештыру җыелышы да узды.
Римма Гатина.