“Ярдәм” дәвалау-укыту тернәкләндерү үзәгендә Малайзиянең ислам финанслары белгечләре булды

Үзәкнең эшчәнлегенә алар бик сокланды һәм мондагы тәҗрибәне мөмкин кадәр зуррак аудиториядә таратырга кирәк дигән фикергә килде. Ислам банкингы һәм финанслар институты карамагындагы Өлкән киңәшче, Шәригать буенча Консультатив комитет җитәкчесе Разли бин Рамли, Малайзиядәге финанс сәнәгать оешмасы карамагындагы шәригать эксперт төркеме җитәкчесе Мөхәммәт Фирдәвес күрмәүчеләрне тернәкләндерү һәм белем бирү белән бәйле һәр нәрсәне кызыксынып тыңлады, ара-тирә баш та чайкап куйдылар. Коръән өйрәнү мәркәзендә шәкертләрнең уңышларына сокландылар.

> Фотосурәт: Римма Гатина

Россия мөфтиләре Советы аппараты җитәкчесенең ислам икътисады һәм финанслар буенча киңәшчесе Мәдинә Кәлимуллина: “Мин бу үзәк турында Казанда яшәүче кешеләрдән дә, башка төбәктәгеләрдән дә күп тапкырлар ишеткәнем бар иде. Ә бүген монда күргәннәрем көткәннән дә яхшырак булып чыкты. Мин күрмәүчеләр белән алып барылган эш турында гына ишеткән идем. Ә ул үзәкнең бер юнәлеше генә булып чыкты. Монда башкарылган эш күп кенә чит ил оешмалары өчен дә үрнәк булырлык. Бүген Малайзиядән килгән кунаклар да монда алып барылган эшчәнлекнең мәчет кысаларыннан чыгып, үзәк буларак үсеш кичерүен билгеләп үтте.

Әлеге үзәк, мондагы технологияләр, методикалар, бу үзәк бирә торган мөмкинлекләр турында мәгълүмат бик аз. Мондагы күргәннәрне, төшергәннәрне анализларга, карарга һәм бу тәҗрибәне башка төбәкләргә ничек җиткерү турында уйларга кирәк. Башкаларга гыйбрәт булсын өчен, әлеге мәгълүматны күбрәк кешенең белүе кирәк” - диде.

"Ислам тикшеренүләр һәм белем бирү институты"ның "Ислам социаль-финанс хисабы - 2016" проектында катнашучы, Ислам финанслары буенча 2 китап авторы, хәзерге вакытта ирекле тикшеренүче Резидә Габбасова (бүгенге көндә Германиядә яши): ““Ярдәм” милли ислам хәйрия фонды алып барган эшчәнлекнең күләменә, үзәкнең ничек итеп җиһазлануына, “Ярдәм” мәчетенең матурлыгына шаккатым. Монда шөгыльләнгән кешеләрне күрү белән, минем йөрәгем кысылып куйды (алар бүген ишетмәүчеләрнең курслары ябылган вакыттка туры килде). Илдар хәзрәт Баязитов ("Ярдәм" мәчете имам-хатыйбы, "Ярдәм" милли ислам хәйрия фонды тормышка ашыра торган социаль проектларның кураторы - ред.), Мәликә ханым Гыйльметдинова ("Ярдәм" дәвалау-укыту тернәкләндерү үзәге җитәкчесе - ред.) һәм үзәкнең башка хезмәткәрләре бик игелекле эш эшлиләр. Башкалар өчен үрнәк булсын бу үзәк. Мондый юнәлештәге яңа үзәкләр барлыкка килсен. Биредә белем алып та, тернәкләнү узып та, буш вакытыңны файдалы итеп тә уздырып була. Уникаль үзәк бу. Мин бу үзәк турында күбрәк кеше белсен өчен тырышачакмын”, - диде.

Римма Гатина.