Балалар, Франциядән, Казанга килеп, "Ярдәм" мәчетенең Коръән хафизлар әзерләү бүлегендә гыйлем туплаучы Гыймран Шибугаев белән танышты.
Үз яшьтәшләре булган Гыймранның, күзләре күрмәвенә карамастан, Коръәннең 17 җүзен яттан белүенә, Изге китапны Луи Брайль системасында тәҗвид кагыйдәләре белән зур тизлектә укуына яшүсмерләр шаккатты, аның укуын, тын да алмыйча, сокланып тыңлады. Гыймран 2016 ел башында Пермьдә узган Коръән укучылар бәйгесендә икенче урын алган иде.
Балалар барлык сыйныф бүлмәләре белән җентекләп, бик кызыксынып танышты. Аларны "сөйләшә торган" лифт җәлеп итте, ә инде уен бүлмәсенә кергәч, бигрәк нык шатландылар һәм уенга бирелделәр.
Экскурсия азагында һәр балага нәни генә бүләкләр тапшырылды, "Ярдәм" мәчете имамы ярдәмчесе Рафис Мингәрәев белән очрашу оештырылды.
Лилия Сәләхетдинова.