Район башлыгы Ленар Закиров исә Илдар хәзрәт Баязитов белән күрешүне, аның Бөгелмәгә килүен үзләре өчен олы мәртәбә булуын белдерде, "Ярдәм" тернәкләндерү үзәгенә инвалидларны алып килүдә ярдәм итәргә сүз бирде.
Үзәк мәчеттә җәмәгать белән өйлә намазын укыганнан соң, кунаклар мәхәллә халкы белән очрашты. "Ярдәм" ислам хәйрия фондының эшчәнлеге хакында бәян ителде, тернәкләндерү үзәген яхшырак күзаллау максатыннан, видеофильмнар күрсәтелде.
Шушы бер гаепсез балаларның үзләренә бирелгән сынауларга карамастан, тормышны яратуы, чын йөрәк белән әниләренә "мин үзем булдыра алам" дигән сүзләрне җиткереп, әти-әниләренең күзләрендә шатлык очкыннары күрергә теләүләре йөзләренә чыкканлыгы күренде. Аллаһ с.в.т. балаларга, аларның ата-аналарына сабырлык бирсен!
Лилия Сәлахетдинова.