Бүгенге көндә хәзрәтләр, динне тарату белән бергә, тынычлыкны саклау өчен дә зур тырышлык куя - Татарстан мөфтие

Бүген Казанда Диния нәзрәтенең 2017 елдагы беренче Президиум һәм пленар утырышы булды. Җыелыш Татарстан мөфтие Камил хәзрәт Сәмигуллин җитәкчелегендә барды һәм мөфтинең урынбасарлары, нәзарәтнең голәмәләр һәм Казыйлар шуралары әгъзалары, республиканың барлык районнары имам-мөхтәсибләре катнашында үтте. Пленумда 2017 елга планнар барланды һәм корылтайга кагылышлы сораулар каралды.

БӘЙЛЕ
2017 Янв 11. Фото:dumrt.ru

Гадәттәгечә чара Коръән уку белән башланды һәм мөфти Камил хәзрәт Сәмигуллинның чыгышы белән дәвам итте. Ул чыгышын рәхмәт сүзләреннән башлады. Аерым алганда, мөфти биредә утырган имам-мөхтәсибләргә, авылларда эшли торган хәзрәтләргә, шулай ук казыйларга, Голәмәләр Шурасы әгъзаларына, мәдрәсә җитәкчеләренә һәм башка дини эшләрне алып баручыларга олы рәхмәтен белдерде.

"Аллага шөкер, бүген безнең республикада дин кушканча яшим дигәннәргә мөмкинлекләр күп. 1500 ләп мәчет бар. Ике атнага бер мәчет ачыла. Бу бит безнең әбиләр-бабайлар күз алдына да китерә алмаган сан. Алар кебек хәзер берәү дә намазын качып укып йөрми. Без бу хәлләргә сөенәбез, Аллаһка мең шөкер кылабыз. Әмма шул ук вакытта дини булып яшәү - бер хәл, ә менә дини эшләрне алып бару, оештыру, халык белән эшләү бөтенләй башка җаваплылык икәнне белеп торабыз. Биредә утырган хәзрәтләр арасында 20-30 ел эшләгәннәр дә, берничә ел элек кенә нәзарәткә килүчеләр дә бар.

Менә кайберәүләр мәчетләрдә эшләүне бик җиңел эшкә санап киләләр дә 2-3 айдан юкка чыгалар. Чөнки биш вакыт намазны үзеңә генә түгел, җәмәгатькә дә өйрәтергә кирәк. Моның өчен әле аларны мәчеткә китерәм дип, күпме чара уздырасың, укытасың, нәсыйхәтлисең һәм башка эшләрне эшлисең... Моны бик күп дини эшләрнең башында торган хәзрәтләр генә аңлый. Соңгы елларны грантлар белән булышып ярдәм итәргә тырышабыз, республика җитәкчеләре ярдәмендә әллә ничә миллион сум торган дини корылмалар төзелә. Коръән бастырабыз, китаплар нәшер итәбез, 10 мең кешелек ифтар оештырдык, бер-бер артлы бик матур дини мәҗлесләр үткәрелеп тора... Чит илләрдән кунаклар чакырабыз, аларга республикадагы мөселманнар тормышы хакында сөйлибез. Әгәр дә без төрле тараф кешеләре булсак, бу хакта рәхәтләнеп сөйли алмас идек, бу эшләрнең берсе дә барып чыкмас иде... Әгәр дә без үзара бердәмлекне саклый алмасак, бернинди алга китеш тә булмас иде. Димәк, бүгенге көндә хәзрәтләр динне тарату белән бергә, тынычлыкны саклау өчен дә зур тырышлык куялар. Алга таба да, бер-беребезгә ярдәм итеп, үзара дус булып, бердәм булып дини эшләрне алып барырга язсын иде", - дип әйтте Камил хәзрәт һәм сүзләрен күәтләп, дин әһелләренә Рәхмәт хатлары тапшырды.

Мөфти хәзрәтләре агымдагы елда дини өлкәдә башакырылачак кайбер вакыйгаларга тукталды. Аерым алганда, зур һәм тарихи вакыйга - Болгар ислам академиясен ачу. "Анда эшләргә яңа коллектив туплана. Кемнәргәдер Болгарга күчәргә дә туры киләчәк. Яңа дөньякүләм дини мәгариф үзәген оештыру өчен Казан белән Болгар арасын шактый таптыйсы була. Бу тарихи идеяне тормышка ашыру җиңел түгел. Әмма Болгарга барырга ерак дип утыра алмыйбыз. Хәтта укучы булып та, без академияне эшләтеп җибәрергә өлеш кертә алабыз", - диде мөфти хәзрәтләре.

Пленар утырышта Голәмәләр һәм Казыйлар шуралары хисаплары һәм тәкъдимнәре, мөфти урынбасары Рөстәм хәзрәт Хәйруллин, нәзарәтнең юридик бүлек җитәкчесе Айрат Билаловның чыгышлары тыңланылды, дип хәбәр итәләр Татарстан мөфтие матбугат хезмәтеннән.


Комментарийны калдырыгыз
avatar

Авг 13
Авг 08
Авг 02
Июл 16
Июл 03
Июн 27
Май 22
Май 18
Май 17
Май 14
Май 14
Май 07
Май 01
Апр 19
Апр 12
Апр 11
Фев 14
Фев 05
Янв 15
Дек 26

40 тартма
Дин
Мәкаләләр


Вакыйга

Май 07

Май 10

Фев 09

Янв 11

Янв 06

Әңгәмәләр
© 2009-2020 "Татар Ислам" мәгълүмат агентлыгы
Сайтка куелган язмаларга барлык хокуклар «Ислам info» медиа-төркеменә карый. Материаллардан файдаланганда гиперсылтама ясау мәҗбүри. Массакүләм мәгълүмат чарасын теркәү турындагы таныклыгы: ИА № ФС-77-45782 13. 07 2011 ел. Элемтә, мәгълүмати технологияләр һәм массакүләм коммуникацияләр өлкәсендә күзәтчелек буенча федераль хезмәт (Роскомнадзор) тарафыннан бирелгән. Урнаштырылган материал 18+. т.8 927 242 35 78
Сайтлар ясау һәм сайт белән идарә итү — «Ариф» студиясе