Республика күрмәүчеләр һәм начар күрүчеләр өчен китапханәсендә нота-музыка әдәбиятын туплаган каталог төзелде. Ул Брайль шрифты белән алты нокта ысулында эшләнгән.
Әлеге басмада Брайль язуындагы нота дәреслекләренең (әсбаблары) библиографик тасвирламалары туплап бирелгән. Бу әсбаблар Республика күрмәүчеләр һәм начар күрүчеләр өчен китапханәсе һәм аның филиалларында саклана. Аларның саны җиде йөзгә җитә. Монда музыка теориясе һәм Сольфеджио буенча басмалар, балалар музыка мәктәпләре өчен хрестоматияләр, урта музыка белеме бирүче учреждениеләр өчен - ноталар, төрле инструментлар (фортепиано, баян, гитара, балалайка, кыллы һәм башка инструментлар) өчен концерт җыелмалары бар.
Бу әсбаблардан инструментларда яңа уйнарга өйрәнүчеләр дә, профессиональ музыкантлар файдалана ала. Күрмәүчеләр һәм начар күрүчеләр арасында мондый әдәбиятка ихтыяҗ зур булу сәбәпле, бөтен мәгълүмат, бер системага салынып, бердәм каталогта туплап бирелде дип хәбәр итә Республика күрмәүчеләр һәм начар күрүчеләр өчен китапханәсе матбугат хезмәте.