Җыенда халкы 1 миллионнан артып киткән 14 шәһәрдә яшәүче яшьләр катнаша. Делегация составында алтмышлап кеше исәпләнә. Бүген алар “Ышаныч” комплекслы социаль хезмәт күрсәтү үзәгенең “Сердәш” бүлегендә, Тәрбиягә авыр бирелүче яшүсмерләрнең “Дуслык” социаль-тернәкләндерү үзәгендә булды.
Боларның барысы да Казанны яхшырак белү, “Ярдәм” дәвалау-укыту тернәкләндерү үзәге эшчәнлеге белән танышу, тәҗрибә уртаклашу максатыннан оештырылган. Әлеге үзәктә күрмәүчеләр, арбага утырып һәм култык таяклары белән йөрүчеләр, ДЦП диагнозы куелганнар, колаклары ишетмәүчеләр һәм сөйләшмәүчеләр тернәкләндерү курслары уза. Саммитта катнашучылар “Ярдәм” үзәгендәге экскурсиянең башыннан ахырына кадәр үзәк эшчәнлегенә сокланып та, шул кадәр зур күләмдә алып барылган эшкә аптырап та йөрделәр.
“Аннан соң без автобуста барганда яшьләр үзара фикер алыша. Бездә менә монысы юк, ә бездә монысы бар, дип сөйләшәләр”, - дип хәбәр итте әлеге делегацияне озата килгән, Казан шәһәре Балалар һәм яшьләр сәясәте комитетының яшьләр сәясәте учреждениеләре һәм социаль программалар бүлеге баш белгече Екатерина Кувайкина.
Воронеж, Санкт-Петербург, Мәскәү, Омск, Пермь, Чиләбе, Уфа, Самара шәһәрләрендә яшәүче яшьләр, “Ярдәм” үзәге тарафыннан зур социаль эш алып барылуын күреп, үзәкнең нинди акчага тотылуы белән кызыксынды. “Ярдәм” хәйрия фонды вице-президенты Илдар Хисаметдинов аларга Казан мэры Илсур Метшин сүзләре белән җавап бирде. ТР Президенты Рөстәм Минеханов “Ярдәм” үзәгендә булган вакытта Казан мэры Илсур Метшин аңа: “Рөстәм Нургалиевич, үзәк тулысынча иганә акчасы, Попечительләр Советы эшчәнлеге һәм үзе эшләп тапкан акча хисабына яши”, - дигән булган.
Самитта катнашучыларны шулай ук дәүләт, көч структуралары белән хезмәттәшлек, экстремизмга каршы көрәш белән бәйле сораулар кызыксындырды.
Римма Гатина.