Россия күләмендә 19 мәктәп укучысы һәм югары уку йортлары студентлары бәйгенең җиңүчеләре булды. Гала-концертта җиңүчеләрдән тыш ТР халык артисты, Камал театры артисты Илдус Әхмәтҗанов, Казан яшь тамашачы театры актрисасы Елена Калаганова, "Казан” бию ансамбле һәм башкалар катнашты, дип хәбәр итә ТР театр хезмәткәрләре берләшмәсе матбугат хезмәте.
Беренче урынны кече төркемдә (1-4 сыйныфлар) Диләрә Булатова (№5 гимназия, Арча шәһәре) яулады; урта төркемдә (5-8 сыйныфлар) – Инсаф Салаватуллин (№93 гимназия, Казан шәһәре); өлкән төркемдә (9-11 сыйныфлар) – Артур Соловьев (№177 мәктәп, Казан шәһәре). Профессиональ төркемдә беренче урын Идел Киямовка (Казан театр училищесы) бирелде.
"Россия Федерациясе регионнарында татар телен үстергән һәм саклаган өчен” номинациясендә җиңүчеләр һәм Татарларның федераль милли-мәдәни автономиясеннән махсус бүләкләргә лаек булучылар: Әдилә Ауишева (10 яшь, Саратов өлкәсе, "Милли татар гимназиясе”); Алинә Камалетдинова (16 яшь, Удмуртия Республикасы, Ижевск шәһәре, "№6 гимназия”); Динә Касыймова (17 яшь, Удмуртия Республикасы, Белезин районы, "Кистем урта мәктәбе”).
Чыганак: "Татар-информ"