Президентның гомрә хаҗына баруы, безгә дини эшләрне алып барырга ярдәм итүе дә - бик зур бәрәкәт ул - Татарстан мөфтие

16 февральдә ТР МДНнең Пленум утырышы булды. Җыелыш Татарстан мөфтие Камил хәзрәт Сәмигуллин җитәкчелегендә барды һәм мөфтинең урынбасарлары, нәзарәтнең Голәмәләр һәм Казыйлар шуралары әгъзалары, республиканың барлык районнары имам-мөхтәсибләре, мәдрәсә җитәкчеләре катнашында үтте.

БӘЙЛЕ
2017 Фев 16. Фото:dumrt.ru

Бүген утырышта мөфти, баш казый һәм мөфтинең беренче урынбасары булырга теләүчеләр рәсми кандидат буларак расланды.

Мәгълүм булганча, Үзәкләшкән дини оешма – Татарстан Республикасы мөселманнары Диния нәзарәтенең 2017 елның 11 гыйнварында узган чираттагы Пленум утырышында, 1 нче беркетмәгә нигезләнеп, мөфти һәм баш казый, мөфтинең беренче урынбасары вазыйфаларына кандидатлар тәкъдим итү таләпләре билгеләнгән иде. 13 гыйнвардан башлап 13 февральгә кадәр кандидатлардан гаризалар кабул ителде. Кандидатлар мөхтәсибәтләр уздырган җыелышларда каралды.

Мөфтилеккә рәсми кандидат итеп Камил хәзрәт Сәмигуллин расланды (“Тынычлык” мәчете имам-хатыйбы, Татарстан мөфтие).

Баш казый вазыйфасына рәсми кандидат итеп Җәлил хәзрәт Фазлыев (Балтач районы имам-мөхтәсибе, баш казый) расланды.

Мөфти урынбасары вазыйфасына рәсми кандидат итеп Рөстәм хәзрәт Вәлиуллин (Казанның Совет районы имам-мөхтәсибе, төньяк-көнбатыш төбәге казые), Илфар хәзрәт Хәсәнов (“Кол Шәриф” мәчете имам-хатыйбы) расланды.

Җыелышта Камил хәзрәт үзенең кандидатурасын тәкъдим итүче мөхтәсибәтләргә ышаныч белдергән өчен рәхмәт әйтте. “Авылларда дини эшләрне җигелеп алып баручыларга, имам-мөхтәсибләргә, сезнең кул астында эшли торган авыл имамнарына ихластан зур рәхмәт, Аллаһы Тәгалә сезне ярдәменнән ташламасын”, - диде.

Аннары теләкләрен җиткерде:

“Әлбәттә, дүрт ел эчендә төрле вакытлар, авыр чаклар да булгандыр, иң мөһиме бердәм булып эшләдек. Шуңа күрә төрле кыен проблемалардан җиңелрәк чыга алдык. Иң дөресе - динебез өйрәткәнчә хәрәкәт иттек, һәрвакыт хәрәкәттә булдык. Динебезгә, республикабызга, мөселманнарга файда итәргә тырыштык. Шундый татарча әйтем бар бит, хәрәкәттә - бәрәкәт, диләр. Ягъни хәрәкәт булса - бәрәкәт килер. Аллага шөкер, тынычлыкның да, бердәмлекнең дә, шулай ук үзара сөйләшеп-килешеп эшләүнең, тырышлыкның бәрәкәтен күреп торабыз. Президентның гомрә хаҗына баруы, безгә дини эшләрне алып барырга ярдәм итүе дә - бик зур бәрәкәт ул. Алга таба да Аллаһы Тәгалә эшләребезне, уйларыбызны, ниятләребезне бәрәкәтле итсен иде. Алга таба да иң зур теләк шул - ниятләребез, фикерләребез бер булсын. Аллаһы Тәгалә ризалыгы, өммәтебез, республикабыз өчен бергәләп күркәм гамәлләр кылырга язсын. Дини эшләребезне Хәнәфи мәзхәбенә һәм Матуриди гакыйдәсенә туры китереп алып барырга насыйп итсен. Аллаһы Сөбханәһү вә Тәгалә барыбызга да ныклык һәм сабырлык бирсен!”​

Җыелышта Корылтай көне билгеләнде. Татарстан мөселманнары Диния нәзарәтенең VII Корылтае 17 апрельдә уздырыла.

Шуны да әйтергә кирәк, бүген мөхтәсибәтләрдән делегатлар саны да билгеләнде. ТР МДН тарихында беренче мәртәбә делегатлар санына чикләү куелмады, мөхтәсибәтләр Корылтайга күпме имам алып килүләрен үзләре билгеләде.

Шулай итеп, быел Татарстан мөфтиен, аның беренче урынбасарын һәм баш казыйны иң күп сандагы делегатлар сайлавы көтелә, дип хәбәр итә матбугат хезмәте.


Комментарийны калдырыгыз
avatar

Авг 13
Авг 08
Авг 02
Июл 16
Июл 03
Июн 27
Май 22
Май 18
Май 17
Май 14
Май 14
Май 07
Май 01
Апр 19
Апр 12
Апр 11
Фев 14
Фев 05
Янв 15
Дек 26

40 тартма
Дин
Мәкаләләр


Вакыйга

Май 07

Май 10

Фев 09

Янв 11

Янв 06

Әңгәмәләр
© 2009-2020 "Татар Ислам" мәгълүмат агентлыгы
Сайтка куелган язмаларга барлык хокуклар «Ислам info» медиа-төркеменә карый. Материаллардан файдаланганда гиперсылтама ясау мәҗбүри. Массакүләм мәгълүмат чарасын теркәү турындагы таныклыгы: ИА № ФС-77-45782 13. 07 2011 ел. Элемтә, мәгълүмати технологияләр һәм массакүләм коммуникацияләр өлкәсендә күзәтчелек буенча федераль хезмәт (Роскомнадзор) тарафыннан бирелгән. Урнаштырылган материал 18+. т.8 927 242 35 78
Сайтлар ясау һәм сайт белән идарә итү — «Ариф» студиясе