Тормыш чоңгылыннан чыгарга омтылыйк!. Вакыйга. Татар-Ислам

2012 Дек 02

Бүген башкалабызның «Рәйхан» хәләл кафесында (Мәскәү урамы, 2а йорт) "Сөләйман” мәчетендә дини белем алучы күзләре күрмәүчеләр һәм ятим балалар өчен хәйрия мәҗлесе үткәрелде. Аны "Сөләйман” мәчете каршындагы "Ярдәм” Милли ислам хәйрия фонды (президенты – Илһам Исмәгыйлев) һәм "Три кита” оешмасы (җитәкчесе – Раил Сабиров), "Аудэкс” компаниясе хезмәткәрләре (директоры – Айрат Гыймадетдинов) оештырды. Бу изге эштә Киров һәм Мәскәү районы хакимияте вәкилләренең дә ярдәме булды.

Аш мәҗлесендә кунаклардан Казан мөхтәсибәте президиумы әгъзалары Алан Панарин, Илдар Баязитов һәм "Ярдәм” фондының совет әгъзасы Хәбибрахман Миңнуллин катнашты.
80 кешегә исәпләп оештырылган мәҗлестә катнашучыларның күпчелеген балалар тәшкил итте. Бу мәҗлестә аш-су да, балаларга бүләкләр дә мулдан әзерләнгән иде.

"Три кита”ның җитәкчесе Раил Галимҗан улы мәҗлес барганда чыгыш ясап: "Моннан берничә ел элек мин очраклы рәвештә "Сөләйман” мәчетенә килеп эләктем һәм бүгенге көндә моңа бик шатмын. Бу мәчетнең имамы Илдар хәзрәт Баязитов мине юмарт һәм кешеләргә ярдәмчел булырга өйрәтә. Гадәттә, без тулысынча эшкә чумабыз да, тирәбездә ярдәмгә мохтаҗларның барлыгын истән чыгарабыз. Ә Илдар хәзрәт безгә бу хакта онытырга ирек бирми. "Ярдәм” фонды безгә күбрәк мөрәҗәгать итсен иде”,-диде.

Хәйрия мәҗлесе вакытында берсеннән берсе тәмле тәгамнәрне татулар күңел ачулар белән бергә үрелеп барды. Мәсәлән, Сабур Хәйретдинов балаларга табышмаклар әйтеп, бәйге оештырды, аларның гыйлем дәрәҗәсен тикшерде. Анда җиңүчеләргә бүләкләр тапшырылды. Хәер, бу көнне балаларның берсе дә бүләксез калмады. Аларның йөзеннән елмаю китмәде.

Танылган гармунчы Ренат Вәлиев исә төрле уен коралларында кешеләрнең күңелен ачты. Руслан Баһадур татар, үзбәк, рус, итальян телләрендә җырлар башкарды. Татарстан дәүләт җыр һәм бию ансамбле солисты Рамил Миңнегалиевнең чыгышы шулай ук күпләрнең күңеленә хуш килде.

Тәртипләрендә тайпылыш булган ятим балалар аеруча "Минута славы” тапшыруында катнашкан Ренат Хәйруллинның дәртле биюләрен һәм үз тормышы хакында сөйләгән кыйссасын яратып кабул итте дисәк тә хата булмастыр. Ренат Хәйруллин шулай ук ятимлекнең барлык ачысын-төчесен үз җилкәсендә татыган, фәкать чын кеше булырга көчле теләге һәм омтылышы аңа тормышның чоңгылыннан чыгарга булышкан. Аның робот һәм Чарли Чаплин булып биюен балалар көчле алкышларга күмделәр.

"Тәртипләрендә тайпылыш булган балаларны социаль яктан тернәкләндерү үзәге” әһелләре ятим балаларга хәйрия ашы үткәргән өчен "Рәйхан” кафесы директоры Айнур Әхмәтшинга бу көнне "Рәхмәт хаты” тапшырды. "Рәйхан” ашханәсендә "Без сезнең тормышыгызның яхшыруын телибез” дигән бик мәгънәле сүзләр язылган. Әмма алар бары тик рус телендә генә башкарылган. Әгәр мондый кәлимәләр татарча да язылса, кафеның үзенә дә файдасы зур булыр иде.

Хатыйп ГӘРӘЙ