Күрмәүчеләр «Сөләйман» мәчетендә дулкынлану хисләре кичерделәр

Моннан берничә көн элек «Ярдәм» мәчетенә Коръән укырга өйрәнергә килгән күрмәүчеләр Казанның Левченко бистәсендәге “Сөләйман” гыйбадәтханәсенә барырга теләк белдерделәр. Ник дигәндә, “Сөләйман”да алар Брайль системасында изге китапны укырга һәм язарга өйрәнделәр.

Күрмәүчеләрдә бу мәчет турында җылы хисләр саклана. “Ярдәм” мәчетендә физкультура мөгаллиме Рафаэль Мифтаховның сөйләвенә караганда, күрмәүчеләр “Сөләйман” га килүгә, башта мәчет намазын укыганнар, аннары үзләре белем алган бинаның беренче, икенче, өченче катларын караганнар. Алар шулай ук биредә булып узган тарихи вакыйгаларны сөйләделәр, үзләренең бергә биредә белем алган дус-ишләре, танышлары, тәүге Брайль хәрефләрен ничек өйрәнгәннәре хакында тәфсилләп сөйләделәр. Остазлары Мәликә ханым Гыйльметдинова, Роза ханым Мортахина, Суфия ханым Воровьева, Ләлә ханым Җиһаншина турында җылы хисләр саклаулары турында бәян кылдылар.

Удмуртиядән килгән Сәкинә ханым Садыйкова икенче катта ни рәвешле итеп Брайль системасын өйрәнүе, андагы авырлыклар хакында сөйләде. Бергәләп килгән 19 күрмәүче аны тын да алмыйча тыңлады. Сәкинә ханым узган елда дартс буенча үткәрелгән ярышта өченче урынны яулаган. Рафаэль әфәнденең сөйләвенә караганда, алар быел да дартс, шашка буенча бәйгеләр уздырырга ниятли икән.

Күрмәүчеләр мәчет бусагасыннан ук үзләрен күркәм дога һәм матур җырлары белән каршы алган каравылчы, гыйбадәтханә сандугачы Миңлеәхәт (халык аны Мидхәт абый буларак белә) Минҗановның алар күңелен юатуы турында сөйләделәр. Тик бүгенге көндә 1940 елгы Миңлеәхәт абый биредә эшләми, лаеклы ялда икән.

Күрмәүчеләр үзләрен “Сөләйман” мәчетенә алып баручыларга олуг рәхмәтләрен әйттеләр, биредә дулкынлану хисләре кичерүләре хакында белдерделәр.