Чаллыда 19 нчы тапкыр балаларның Коръән уку конкурсы уздырыла

Бүген Чаллыда балалар арасында 19 нчы мәртәбә Коръән уку конкурсы уздырыла. Шәһәрнең "Ак мәчет"ендә үткәрелә торган әлеге чарада җиңүчеләргә Татарстан мөселманнары Диния нәзарәте, Чаллы шәһәре мөхтәсибәте призлары әзерләнгән. Оештыручылары - ТР МДН, Чаллы мөхтәсибәте, "Ислам нуры" дини-эшмәкәрлек үзәге, дип хәбәр итә dumrt.ru сайты.

Коръән уку конкурсында Коръәнне тәҗвид илә укый белүче, ләкин көндезге мәдрәсәләрдә укымаучы 15 яшькә кадәрге ир һәм кыз балалар катнаша. Конкурс малайлар һәм кызлар арасында аерым һәм 4 яшь төркемендә уздырыла: 7, 10, 13, 15 яшькә кадәр. Күрше өлкә, республика вәкилләре бәйгедә башкалар белән тигез шартларда катнаша. Конкурсантларның осталыклары түбәндәгечә бәяләнә:
1. Коръәнне тәҗвид илә карап уку: 0-12 балл.
2. Коръәнне тәҗвид илә яттан уку: 5-12 балл.
3. Мәкам: 1 - 3 балл.
4. Мөселманча киенү, үз-үзеңне тотыш: 1-2 балл.

Җиңүчеләрне бүләкләү каралган.
Һәр яшь төркемендә өчәр призлы урын билгеләнә. Җиңүчеләр истәлекле бүләкләр һәм дипломнар белән бүләкләнә. Кызлар һәм малайлар арасындагы иң яшь катнашучыларга шулай ук призлар бирелә. Спонсорлар аерым катнашучыларга үз призларын чыгара, дип белдерә ТР мөфтияте сайты.
Чыганак: "Татар-информ"