Казанда "Россиядә вакфлар: хәзерге халәте һәм перспективалары" II Халыкара фәнни-гамәли конференциясе башланды.
Фәнни җыенда чит илләр һәм төбәкләрдән килгән мәртәбәле кунакларны пленар утырышта Татарстан мөфтиенең беренче урынбасары Рөстәм хәзрәт Вәлиуллин һәм Татарстан мөфтие урынбасары, "Татарстан Республикасы вакфы" фонды генераль директоры Мансур хәзрәт Җәләлетдин сәламләде. Рөстәм хәзрәт Татарстан мөфтие Камил хәзрәт Сәмигуллинның сәламнәрен җиткерде һәм вакфны ислам дине тарафыннан дөньяга бүләк ителгән уникаль күренеш дип билгеләде.
- Казан ислам дөньясының төньяк башкаласы дигән дәрәҗәне гадел рәвештә казанды, - дип башлады үзенең сүзен Мансур хәзрәт. - Бер яктан, татар халкының бай рухи мирасы һәм көчле дини традицияләре, икенче яктан, республика җитәкчелегенең уйланып алып барылган милли сәясәте һәм ТР мөселманнары Диния нәзарәтенең инициативалары Татарстанга Россиянең алдынгы төбәкләре арасында булырга ярдәм итә. Бездә ачык һәм дустанә ислам чәчәк ата һәм илебездә динебезнең үсеш юнәлешләре билгеләнә.
Фәнни җыенның пленар утырышында шулай ук Төркия Республикасының Казандагы генераль консулы Турхан Дилмач, Иран Ислам Республикасының Казандагы Генераль Консуллыгы җитәкчесе вазифаларын вакытлыча башкаручы Алибеман Эгбали Зарч, Бәхрәйннән югары шәригать суды рәисе Ибраһим әл-Мурейхи, Ислам үсеше банкы белгече Мөхәммәд Салем чыгыш ясаячак дип хәбәр итәләр Татарстан мөфтиятеннән.