Тикшерүчеләр Казандагы авиаһәлакәт урынындагы эшне төгәлләде

Тикшерүчеләр Казандагы авиаһәлакәтне тикшерү эшен тулысынча төгәлләде, дип хәбәр итә Россия Тикшерү комитеты матбугат хезмәте.

Фаҗига булган урында 4 көн тәүлек буена 1000нән артык кеше эшләде. Хәзерге вакытта авиаһәлакәттә булган барлык хәлләрне билгеләү өчен тикшерү эше комплексы дәвам ителә.
Якын арада техник экспертизалар билгеләнеп, фаҗиганең тулы сәбәбен ачыклап булачак. Һәлак булган кешеләрнең җәсәден танып белүне тизләтү максатыннан, 500гә якын геннар экспертизасы уздырылачак.

Тикшерү органнары Казанда 17 ноябрьдә кичке якта барлыкка килгән авиаһәлакәттә берничә төрле фаразны – очучыларның хатасын, техниканың төзек булмавын, сыйфатсыз ягулык, һава торышын һәм диспетчерлар ялгышын карый. 18 ноябрьдә "Татарстан” авиакомпаниясе үзенең Боинг 737-500 кебек очкычларын куллануны туктатты.

Бу һәлакәт буенча Тикшерү комитеты тарафыннан "Хәрәкәт иминлеге кагыйдәләрен бозу һәм һава транспортын эксплуатацияләүдә саксызлык күрсәтеп, ике һәм аннан күбрәк кеше үлеме” маддәсе буенча җинаять эше ачылды.