Татарстанлылар май бәйрәмнәрендә - 4 көн һәм Җиңү көне уңаеннан, 3 көн ял итәчәк

Майда Татарстан халкын өстәмә ял көннәре көтә.

РФ Хезмәт кодексының 112 нче маддәсе нигезендә 1 Май (Яз һәм хезмәт бәйрәме) һәм 9 Май (Җиңү көне) - эшләми торган бәйрәм көннәре.

Татарстан Хезмәт, мәшгульлек һәм социаль яклау министрлыгы матбугат хезмәте искәртеп үткәнчә, хезмәткәрләр тарафыннан ял һәм эшләми торган бәйрәм көннәрен рациональ файдалану максатыннан, РФ Хөкүмәтенең “2014 елда ял көннәрен күчерү турында”гы Карары нигезендә, 2014 елда 4 гыйнвар ялы 2 майга күчерелгән.

Шулай итеп, 2014 елда биш көнлек эш атнасында 1, 2, 3 һәм 4 нче майлар, шулай ук 9, 10 һәм 11 майлар ял көннәре була дип хәбәр итте "Татар-информ".