«Татар-информ»мәгълүмат агентлыгында "Ярдәм - Помощь" хәйрия фондының 2021 елдагы эшчәнлегенә нәтиҗәләр чыгарылды. Журналистлар белән очрашуда Президент фонды ярдәме белән финансланган "Йөрәк белән күрәбез һәм ишетәбез" һәм "Тормыш юлы" кебек ике проект турында сөйләделәр. Әлеге проектларны тормышка ашыру өчен бирелгән грант тәмамлана, әмма бу проектлар "Ярдәм - Помощь" хәйрия фондының үз мөмкинлекләреннән чыгып дәвам иттереләчәк. Матбугат очрашуында шулай ук фондның яңа проектлары турында да мәгълүмат бирелде. Алар - тиздән төзелеп бетәчәк күпфункцияле спорт комплексы һәм ноябрь аенда башланып киткән "Күңелем белән Коръән укыйм" проектлары. Моннан тыш, журналистларга фонд исемендәге үзгәрешләр турында сөйләделәр.