Казыят утырышында Корбан гаетенә кагылышлы мәсьәләләр каралды. Хәбәрләр. Татар-Ислам

2012 Окт 10

Татарстан мөселманнары Диния нәзарәтендә Казыйлар шурасының 51 нче утырышы үтте. Көн тәртибендә һиҗри ел исәбе буенча 1433 елның Корбан бәйрәменә әзерлек мәсьәләләре каралды. Казыйлар шурасы бертавыштан 25 октябрь көнен (Зөлхиҗҗә аеның 10 нчы көнен) Корбан бәйрәме икәнен расладылар.

Шулай ук бәйрәм намазларының төгәл вакыты билгеләнде. Бу көнне иртәнге намаз Татарстанның барлык мәчетләрендә дә иртәнге 6 сәгать 30 минутта укылачак. Соңыннан Коръән укылып, дога кылыначак һәм 7 сәгать 15 минутта гает вәгазе башланачак. (Башкалабызда кояш бу көнне 7 сәгать 34 минутта чыга). Гает намазы иртәнге 8 сәгать 00 минутта укылачак. Телевидениядән турыдан-туры трансляцияне 9да ясарга киңәш ителде. Хәнәфи мәзһәбе буенча 585 гр. көмеш нисаблык малы булган кешегә корбан чалу вәҗеб хөкемендә. Безнең акчага күчереп исәпләгәндә, бу 20 мең сумны тәшкил итә. Корбанлык алырга мөмкинлеге булып та, корбан чалмаган кеше гөнаһлы була. 24-28 октябрь тәшрикъ көннәре булып санала. 24 октябрьнең иртәнге намазыннан алып, 28 октябрьнең икенде намазларына кадәр (барлыгы 23 намаз!), фарыз намазларны үтәгәннән соң, тәкбир әйтү вәҗеб санала. Казыят утырышында шулай ук башка мәсьәләләр дә каралды. Әйтик, никах укыту, зәкят (гошер) түләү һ.б. Чираттагы казыят утырышы 12 ноябрь көненә билгеләнде дип хәбәр итте "Думрт.ру".