Күрмәүчеләр тагын укый башлады

2013 Ноя 05

Бүгеннән Россиядәге Күрмәүче мөселманнарны тернәкләндерү үзәге булган «Ярдәм» мәчетендә яңа уку курслары башланды. Дөрес, әлегә аларның һәммәсе дә килеп җитмәде: бүгенгә 7 ир кеше һәм 10 хатын-кыз "Ярдәм”гә килде инде.

Мөселманнарны Тернәкләндерү үзәге директоры Мәликә ханым Гыйльметдинованың сүзләренчә, 8 ноябрьгә кадәр Россиянең төрле төбәкләреннән – Дагыстан Җөмһүриятеннән, Башкортстанның Уфа, Ишимбай калаларыннан, Пермь, Киров, Екатеринбург, Оренбург, Уренгуй, Глазовтан һәм, әлбәттә, Татарстан шәһәрләреннән, районнарыннан килүчеләрне биредә каршы алачаклар.

Шунысы кызык: ерак Чеченстаннан дүрт кеше иң беренчеләрдән булып, Казанга килеп җитте. Араларында практика узырга теләүчеләр дә бар.

Аларга бер ай дәвамында, теләге булганнарга күбрәк тә, гарәпчә Брайль системасын, Коръәнне укырга өйрәтәчәкләр.

"Без инвалидларны укыту һәм тернәкләндерү буенча дәресләрне элеккечә үк алып барабыз. Аларны "Ярдәм” дә үз исәбебездән ашатабыз, эчертәбез. Юл хакларын да үзебез түлибез. Башлангыч төркемнәр дә, дәвам итүчеләр дә күп булачак бу юлы. Әле без аларның шактыен киләсе курсларда уку өчен калдырдык. Мәдәни программа чараларын да бу тапкыр күп оештырабыз. Театрларга, концертларга алып барабыз аларны”,-ди Мәликә абыстай Гыйльметдинова.

Рәсемдә: укытучы Идрис Хәйретдинов "Ярдәм"гә килүчеләрне Тернәкләндерү үзәге белән таныштыра

Хатыйп ГӘРӘЙ фотохәбәре