Рәфис Кашапов прокурорга һәм җәмәгатьчелеккә мөрәҗәгать итә

Рәфис Кашапов 10 сентябрьдә узачак мәхкәмә утырышы алдыннан прокурорга һәм җәмәгатьчелеккә мөрәҗәгать белән чыгып, үзенең гаепсез булуын белдерде.

БӘЙЛЕ
2015 Сен 03

Рәфис Кашапов 10 сентябрьдә узачак мәхкәмә утырышы алдыннан прокурорга һәм җәмәгатьчелеккә мөрәҗәгать белән чыгып, үзенең гаепсез булуын белдерде.

Минзәлә төрмәсе изоляторында 9 айдан артык утыручы Рәфис Кашапов үзенә карата белдерелгән гаепләүләр уңаеннан 28 августта җәмәгатьчелеккә һәм гаепләү белдергән прокурорга үз фикерләрен юллый. Анда “Минем төрмәдә үлүем ФСБ файдасына булачак. Кеше юк икән, проблем да юк”, ди Рәфис Кашапов.

Рәфис Кашаповның Минзәлә төрмәсеннән язган мөрәҗәгате матбугат чараларына, сәяси-иҗтимагый оешмаларга юнәлтелгән. Аның эчтәлеге түбәндәге язмалардан гыйбарәт.

“Бу елның 24 августында Чаллы мәхкәмәсендә миңа карата чираттагы мәхкәмә утырышы узды. Прокурор үз чыгышының азагында мине гомум режимлы колониягә 4 елга ябуны сорады. Шушы сораудан махсус хезмәтләрнең мине иҗтимагый һәм сәяси тормыштан читләштерергә омтылулары күренә. Бәлки алар шушы вакыт эчендә минем үлемемә өмет итә торганнардыр. Чөнки алар минем сәламәтлекнең ни дәрәҗәдә икәнен яхшы беләләр. “Кеше дә юк, проблем да юк” булганда, барысы да ФСБ файдасына булачак.

Дәүләт гаепләүчесе, ягъни прокурор мине Русиянең территория бөтенлеген бозуга чакыруда, халыклар арасында дошманлык һәм нәфрәт тудыруда гаепли. Шушы гаепләүләр уңаеннан прокурорга, Татарстан халкына үземнең фикерләрне җиткерергә тырышам. Шунысын да искәртәм, миңа карата булган мәхкәмә эшләрендә дәүләт кулында булган матбугат чаралары махсус хезмәтләр басымы аркасында катнаштырылмый", ди Кашапов.

Соңрак ул мөрәҗәгатен болай дәвам итә: "Бу дөнья кай тарафларга тәгәри? Әле кайчан гына иҗтимагый-сәяси чаралар ватандашлар бердәмлеге белән уза торган иде. Ә хәзерге вакытта хәзерге Русиядә сугышка каршы мөнәсәбәт белдерү һәм төрки халыкларны яклау куркыныч була бара. Минем язмаларда Русиянең контрактлы хәрбиләренең суверен Украинага бәреп керүләрендә рәсми хакимиятләрне гаепләүләр дә бар. Мин туганнар булган ике славян халкы арасындагы сугышка каршы. Шулай ук минем "Тюркам нужен центр оперативного реагирования" дигән язмамда да бернинди дә җинаять юк. Төрки дәүләтләрнең башлыклары барысы да Путин белән дус. Төркия президенты Рәҗәп Эрдоган, Әзербайҗан һәм Казакъстан җитәкчеләре Илһам Алиев, Нурсолтан Назарбаевлар төрки халыкларны берләштерү юлында дәүләткүләм эш алып баралар. Ә мин бары төрки халыклар турында мәкалә яздым һәм җинаятьче булдым. Дөреслек кайда? Миңа карата соңгы мәхкәмә утырышы 10 сентябрьдә уза. Монда мәхкәмәнең гадел карары булырмы?" дигән сорау белән тәмамлана Рәфис Кашаповның төрмәдән язган мөрәҗәгате.

Мәхкәмәнең тагын кайбер өлешләренә тукталыйк. Соңгы утырышта прокурор ханым Рәфис Кашапов язмаларына экспертиза ясаучыларга акча түләүне Рәфис Кашапов җилкәсенә салырга теләк белдерде. Прокурор хөкемдарга "Безнең экспертиза чыгымнары 82 мең сум булды . Шушы акчаларны гаепләнүче Рәфис Кашапов түләргә тиеш дип саныйбыз" дигән дәгъвасын җиткерде. Хөкемдар әлегә бу хакта нинди дә булса карар кабул итмәде.

Мәхкәмә утырышларындагы шаһитлар күрсәтмәләрен бәян итү дә кызыклы булырдыр. Зиннур Әһлиуллин бу мәхкәмәдә "Сездә Рәфис Кашапов язмаларын укыгач тискәре хисләр тумадымы", дигән сорауга "Юк, тискәре хисләр тумады. Әммә җәмгыять күзлегеннән караганда, канәгатьлек хисләре туды. Монда Русиянең бөтенлеген җимерү турында сүз була да алмый. Чөнки органнар үзләре кануннарны бозалар", дип җавап бирде. Шушында ук ул хуҗа белән кол арасында тигезлек була алмый, дигән сүзләрне дә өстәде.

Шаһит буларак катнашкан Айдар Хәлим үз җавапларында "...киресенчә, Рәфис Кашапов кебек шундый улы булганда Русия горурланырга тиеш. Рәфис Кашапов язмаларының эчтәлеген ничек кабул итәсез, дип сорыйсызмы? Әйе, ул урыс булмаган бар халыкны яклап чыкты. Әйе, аның язмасындагы сүзләр белән килешәм һәм әйтәм: кайда Русия – шунда күз яшьләре".

Татарстан аксакаллар шурасы рәисе Раиф Галиев шушында ук Рәфис Кашапов язмаларында Русияне җимерерлек көч күрмәвен, киресенчә, ул язмаларда хаклык булуын, шуның өчен Рәфис Кашаповның төрмәдә утыруын белдерде. "Ул дөресен әйткән өчен утыра. Аның белән бергә мине дә хөкем итә аласыз" диде Раиф әфәнде.

Соңгы мәхкәмә утырышларының берсендә Amnesty Internationalның Мәскәүдәге бүлеге вәкилләре Иван Кондратенко һәм Фридерике Бер катнашкан иделәр. Алар мәхкәмә алдыннан һәм тәнәфес вакытларында Рәфис Кашаповны яклап килүчеләрнең фикерләрен белделәр.

Мәскәү вәкилләренә Русиядә инде татар мәктәпләренең калмавын, матбугатның тәүлек буе шушы хакимиятне мактавын, сайлауларда хәрәмләшүләрнең хәттин ашуын халык берсен-берсе бүлдерә-бүлдерә сөйләде. Шунысын искәрттек, мәхкәмә бинасына килгән халыкның мондый эчкерсезлеген, чын күңелдән ачылып китүләрен, татар язмышы өчен борчылуларын күргән Amnesty International вәкилләренең авызлары шактый вакыт ачык килеш калды. Алар күпне күргән, күпне беләдер. Ләкин Чаллыга килгәч милли мәсьәләләрдә татарга булган мөнәсәбәтне күреп нык гаҗәпләнделәр, дигән хис калды.

Чыганак: "Азатлык.орг"


Комментарийны калдырыгыз
avatar

Июл 01
Июн 25
Июн 17
Авг 13
Авг 08
Авг 02
Июл 16
Июл 03
Июн 27
Май 22
Май 18
Май 17
Май 14
Май 14
Май 07
Май 01
Апр 19
Апр 12
Апр 11
Фев 14

40 тартма
Дин
Мәкаләләр


Вакыйга

Май 07

Май 10

Фев 09

Янв 11

Янв 06

Әңгәмәләр
© 2009-2020 "Татар Ислам" мәгълүмат агентлыгы
Сайтка куелган язмаларга барлык хокуклар «Ислам info» медиа-төркеменә карый. Материаллардан файдаланганда гиперсылтама ясау мәҗбүри. Массакүләм мәгълүмат чарасын теркәү турындагы таныклыгы: ИА № ФС-77-45782 13. 07 2011 ел. Элемтә, мәгълүмати технологияләр һәм массакүләм коммуникацияләр өлкәсендә күзәтчелек буенча федераль хезмәт (Роскомнадзор) тарафыннан бирелгән. Урнаштырылган материал 18+. т.8 927 242 35 78
Сайтлар ясау һәм сайт белән идарә итү — «Ариф» студиясе