Аның нияте Кыргызстандагы сукырларга Коръән укырга өйрәтүдән гыйбарәт

2012 Апр 10

Пәйгамбәребез мөселманнарга Кытайга барып булса да, белем алырга кушып калдырган. Кыргызстанның Бишкек каласында туып-үскән 28 яшьлек Абдулла (исламга хәтле исеме – Александр) Жаров исә Коръәнне Брайльчә укырга өйрәнү өчен Казанның "Сөләйман” мәчетенә килгән.

Әлеге гыйбадәтханәдә очрашканнан соң, мин аның милләте белән рус кешесе булганлыгын аңладым. Дөресрәге, паспорты буенча шулай икән. Ә тышкы кыяфәте белән ул күбрәк кыргызларга тартым дияргә дә буладыр. Әтисе – Иван, әнисе кыргыз кызы Алибиби икән аның. Хәер, хикмәт милләттә генәмени. Намаз укырга өйрәнерлек халәткә ирешкәнче Аллаһының шактый сынауларын, бормалы сукмакларын үтәргә туры килә аңа. Абдулланың сөйләвенә караганда, 12 яшькә кадәр ул әле ярыйсы әйбәт күрә, гадәти малай булып үсә. Шулай да табиблар анда катаракта, ягъни күз бәбәге тоныклану авыруы бар дигән диагноз куялар һәм кичекмәстән операция ясарга кирәк дигән карарга киләләр. Операциядән соң, күзләре бер мәлгә яхшырып киткәндәй тоела. Әмма Сашаның шатлыгы озакка бармый. Күзләренең челтәр катлавына зыян килгәнлеге беленә. Тиздән ул дөнья яктылыгын күрүдән бөтенләй мәхрүм кала. Аның көннәре төнгә әйләнә, ул сагышлы уйларга бирелә. Дөрес, озакка бармый аның мондый халәте. Күңел төшенкелегенә бирелергә ярамавына төшенә ул. Бишкектә начар күрүчеләрнең мәктәп-интернатында укуын тәмамлый. Аннары ул Кыргызстан дәүләт университетында юристлык белгечлеге ала. Бер оешмада юристның киңәшчесе вазифасын башкара.
2006 елда Александр үзе кебек үк күзе күрмәүче Хәлимә исемле мөселман кызына өйләнә. Шул вакытларда аның күңеленә әһле исламга карата җылылык иңә. Моннан бер ел элек Хак Тәгалә аңа тагын фаҗигале сынавын бирә: ул юл-транспорт һәлакәтенә юлыга. "Әлеге фаҗига вакытында аягым сынды, ә бит һәлак булырга да бик мөмкин идем. Аллаһы Тәгалә мине саклады. Операциядән соң, тормыштагы кыйммәтләр турында уйланырга вакытым күп булды. Баксаң, минем яшәү рухым тулысынча исламга туры килә икән?! Әлбәттә, үзләренең киңәшләре белән ярдәм итүчеләр дә күп булды. Шуңа күрә моннан бер ел элек шаһәдәт әйтеп, рәсми рәвештә ислам динен кабул иттем”,-ди Абдулла. Шунысы сөендерә: әти-әнисе дә каршы килми аның исламны кабул итүенә. Ә хәләл җефете фәкать куана гына. Шатлык өстенә шатлык булып, аларның кыз баласы дөньяга килә. "Моңа кадәр мин тормышымның мәгънәсен аңламый идем. Хәзер исә тормышымда максат барлыкка килде. Казанның "Сөләйман” мәчетендә Коръәнне укырга өйрәнеп кайтып, минем кебек үк сукырларны изге китапның нигъмәтеннән авыз иттерүдән, ягъни аларны да Брайль системасы кулланып, Коръәнне укырга өйрәтүдән гыйбарәт хәзерге ниятем. Әлеге куанычка ирештергәннәре өчен казанлыларга, аерым алганда, "Сөләйман мәчете әһелләренә Раббыбызның рәхмәтләре булсын дип телим”,-диде Абдулла әфәнде.
Мин әле бу көнне Абдулла кардәшебез белән шактый озак сөйләшеп утырдым. Аның әйтүенчә, Бишкектә 1, 5 миллион кеше яши, анда 70 эре һәм уртача мәчет бар. Башкалада күзләре күрмәүчеләрнең саны 6 меңнән артып китә. Тик аларның Казанга килеп укырга мөмкинлекләре юк. Бу илдә хәнәфи мәзһәбе киң кулланылышта йөри. Ник дигәндә, кыргызларга изге йортларны төзергә төрек кардәшләребез булыша икән. Ә миңа исә Абдуллага изге ниятләреңне тормышка ашыру насыйп булсын, дип теләргә генә калды.