Фәрит Мифтаховның интернеттагы сәхифәсеннән

Татарстан Дәүләт Советы депутатлары арасыннан Фәрит Мифтаховның интернетта үз сәхифәсе бар. Ул анда 19 июльдә куелган язмада Казанның «Сөләйман» мәчетендәге балалар лагеренда булуы турында бәян итә. Бу язмада мондый юллар бар:

«56 бала ял итә торган «Сөләйман» мәчетендә булып, мөселманнар лагерен үткәрүнең барышы белән таныштым. «Сөләйман» мәчетенең имам хатибы Илдар хәзрәт Баязитовны бик хөрмәт итәм. Ул бу лагерьда ял итүче балалар белән очрашу оештырды, ә алар миңа төрле сораулар яудырды. Шәхсән минем тормышыма кагылышлы сораулардан тыш, балалар һөнәри эшчәнлегемә багышланган җитди сөальләр дә бирделәр.

Миңа мондый аралашу нык тәэсир итте. Шуңа күрә лагерьның ябылу тантанасы вакытында иң кызыклы сорау биргән малайга истәлеккә бүләк тапшырырга дигән карарга килдем.

Бу очрашу вакытында үземнең «Теплоконтроль» заводыннан Дәрвишләр бистәсендә һәм Аккош күле янындагы «Спартак» лагеренда ял итеп йөргән чакларым, андагы линейкада тезелеп басып торулар, иске дусларым искә төште.

Мин бу көнне (18 июльдә) шәхсән үз исемемнән һәм «Булгар» Милли хәйрия фондыннан «Ярдәм» Ислам милли хәйрия фонды президенты Илһам Исмәгыйлевка һәм «Сөләйман» мәчете каршындагы күзләре күрмәүчеләрне Тернәкләндерү үзәге директоры Мәликә ханым Гыйльметдиновага инвалидлар белән эшләүдә бәяләп бетергесез өлеш кертүләре өчен рәхмәт хатлары тапшырдым».