Нәзарәт, "Ихлас" мәчете һәм «Ирбис» ягулык салу станциясе Россия федераль трассаларында намаз бүлмәләрен ача

Тантаналы чарада Татарстан мөфтие Камил хәзрәт Сәмигуллин, «Приют человека» мохтаҗларга ярдәм итү пункты» социаль проекты җитәкчесе Азат Гайнетдинов, «Ирбис» автомобильләргә ягулык салу станцияләре генераль директоры Ирек Вәлиев, социаль проектлар җитәкчесе, гыйбадәт кылу бүлмәләрен төзү һәм аларга хезмәт күрсәтү буенча координатор, эшмәкәр Инсаф Вәлиев, шулай ук Татарстанның баш казые Җәлил хәзрәт Фазлыев, мөфти урынбасары Ришат Хәмидуллин, Нәзарәтнең “Хәләл” стандарты буенча комитеты рәисе Аббяс хәзрәт Шляпошников һәм проектны тормышка ашыручы башка затлар катнашты.

«Юлчы намазы» проекты ТР мөселманнары Диния нәзарәтенең методик ярдәме белән тормышка ашырыла. Әлеге эшнең башлап җибәрүчесе - «Ихлас» мәчете (Татарстан Республикасы Лаеш районының Усад авылы), шушы ук мәчеткә нигез салучы, «Тернәкләндерү һәм җәмгыятькә җайлаштыру үзәге” автоном коммерцияле булмаган оешма (АНО ЦРА) генераль директоры Азат Гайнетдинов. Төп партнер - «Транзит Сити» компанияләр төркеменә караган «Ирбис» автомобильләргә ягулык салу станцияләре. Моннан тыш, иганәчеләр, мөселман эшмәкәрләре һәм битараф булмаган дин кардәшләр дә ярдәм итә.

"Юлчы намазы" проекты Россия федераль трассаларында урнашкан "Ирбис" автомобильләргә ягулык салу станцияләре территорияләрендә намаз уку бүлмәләрен урнаштырудан гыйбарәт. Барлыгы «Волга» М7 һәм «Урал» М5 трассаларында илнең 7 төбәгендә: Владимир һәм Түбән Новгород өлкәләре, Чувашия, Мари Эл Республикалары, Татарстан Республикасы һәм Башкортостан Республикасы, шулай ук Пенза өлкәсендә 24 стационар мүсаллә (намаз уку урыны) ачу ниятләнә. Намаз бүлмәләре челтәре картасы автомобиль юлларының теге яки бу участокларында булган ихтыяҗдан чыгып төзелде.

Бүген беренче намаз бүлмәсе үз ишекләрен М7 трассасының 710 километрында Чувашия Республикасының Сине-Кинчере авылында ачты. Ул сендвич-панельләрдән төзелгән, бәдрәфе һәм тәһарәтханәсе бар, электр һәм су кертелгән, җылы идәннәр ясалган, онлайн-камералар белән җиһазландырылган. Мәйданы - 15 кв. м., берьюлы 10 кеше намаз укый ала.

Шунысы игътибарга лаек, әлеге башлангыч кысаларында намаз уку өчен барлык бүлмәләр дә бертөрле проект буенча урнаштырылачак. Мәсәлән, тагын шундый ук 3 бүлмә ачылырга әзер:

- М7 трассасының 350 километрында, Түбән Новгород өлкәсе Володар районының Ильиногорск шәһәр тибындагы бистәсе;

- М7 трассасының 454 километрында, Түбән Новгород өлкәсе Кстов районының Подлесово авылы;

- М7 трассасының 611 километрында, Чувашия Республикасы Моргауш районының Юнгапоси авылы.

Бу бүлмәләр дә эшли башлады инде.

«Ирбис» автомобильләргә ягулык салу станцияләре территорияләрендә гыйбадәт бүлмәләрен урнаштыру юлчылар өчен өстәмә уңайлыклар тудыра. Алар, намаз укып, автомобильләргә ягулык салу станциясе комплексына караган кафе һәм мини-маркетларга керә, ягулык сала, автотоварлар сатып ала, Wi-Fi, автосервистан, душтан, банкоматтан файдалана ала.

Әлеге чара барышында мөфти Камил хәзрәт дин кардәшләр мөселман эшмәкәрләренә теләктәшлек күрсәтсен һәм аларның товар һәм хезмәтләрен сайласын иде, дигән фикер белдерде. Ул шулай ук Россия трассаларында гыйбадәт бүлмәләрен урнаштыру буенча охшаш проектлар белән илнең төрле төбәкләрендә эшли торган дини һәм бизнес-структураларның да кызыксынуына өметен әйтте. Бу автомобиль юлларында мөселман инфраструктурасын мөмкин кадәр киңрәк итеп җәелдерүгә китерәчәк.

Ирек Хәсбиулла улы, үз чиратында, трассаларда намаз уку бүлмәләренә ихтыяҗның зур булуын ассызыклады һәм ышаныч белдерүләре өчен оештыручыларга рәхмәт белдерде. Аңа, шулай ук гыйбадәт бүлмәләренең генераль подрядчысы һәм төзүчесе Рәис Вәлиевка һәм проектның кураторы, «Ирбис» автомобильләргә ягулык салу станцияләрендә гыйбадәт бүлмәләрен карап тотуны үз өстенә алган Рөстәм Хәмидуллинга мөфти хәзрәт, трассаларны гыйбадәт бүлмәләре белән тәэмин итүдә катнашкан өчен рәхмәт хатлары тапшырды.

Аннан чарада катнашучылар, тәкбир әйтеп һәм тасманы кисеп, намаз бүлмәсенә керде һәм ике рәкәгать намаз укыды.

Теләге булган һәркем федераль автомобиль юлларында намаз уку бүлмәләре ачу проектын тормышка ашыруда финанс һәм оештыру ягыннан катнаша ала. Ярдәм күрсәтү турындагы сораулар белән +79872092607 номерына (WhatsApp, Инсаф Вәлиев) мөрәҗәгать итәргә мөмкин.

Чыганак: Татарстан мөселманнары Диния нәзарәтенең матбугат хезмәте.