Ибраһим хәзрәт Шаһимәрдәнов: "Өлкәннәрнең Аллаһы Тәгалә каршында дәрәҗәләре зур, догалары кабул ителә”

Шушы ункөнлектә өлкәннәргә игътибар артып китә, алар өчен махсус чаралар уза – кыскасы, өлкәннәр үзләрен җәмгыятьтә кирәкле кеше дип тоя башлый. Ә чынлыкта инде сәламәтлекләре дә ташка үлчим булган, илне күтәрүгә бөтен барлыгын биргән, гомер көзен каршылаучы өлкәннәребез көн дә игътибарга, кайгыртуга лаек ләбаса.

Бүген Казандагы “Ярдәм” мәчете янындагы шатырда Халыкара өлкәннәр көненә багышлап үткәрелгән матур бер чарада, шушы фикер тагын да үстерелеп, өлкәнәргә карата якты йөзле һәм мәрхәмәтле булу динебезнең бер сыйфаты икәнлеге билгеләп үтелде. Безгә – мөселманнарга – шушы 10 көн дәвамында гына түгел, гомер дәвамында өлкәннәребезгә кадер-хөрмәт күрсәтеп яшәргә кирәклеге турында әйтелде. Олы яшьтәге әби-бабайларга кадер-хөрмәт күрсәтелде. Хәер, биредә өлкәннәребез үзләренә, бүген генә түгел, һәрдаим игътибар тоеп яши.

Догалы мәҗлестә “Ярдәм” мәчете имамы Ибраһим хәзрәт Шаһимәрдәнов өлкәннәр булган җирдә бәрәкәт барлыгын ассызыклап үтте. “Өлкән кешеләрдә акыл, тәҗрибә, хикмәт бар. Аларның Аллаһы Тәгалә каршында дәрәҗәләре зур, догалары кабул ителә”, - диде ул. Имам сүзләренчә, мөселман илләрендә картлар йортлары да юк. Андагы мөселманнар әти-әниләренә карата яхшы мөнәсәбәттә булса, үзләренең тормышлары – яхшы, бәрәкәтле булачагын ачык аңлый. Безнең күңелләрдә исә барлык илләрдә дә шулай булса иде теләк чыңлый.