Физик мөмкинлекләре чикләнгән кешеләр турында кайгырту – Аллаһ тарафыннан бөтенебезгә дә йөкләнгән бурыч

Софья Ширяева гаиләсендә барысы да инвалидлар. Гаилә бюджетының күп өлеше даруларга китә. "Без Диния нәзарәтенең күчтәнәчләренә бик шат", - дип сөйли Софья. - Игътибарыгыз һәм мөмкинлекләре чикле кешеләрне кайгыртуыгыз өчен рәхмәт сезгә. Үтенечләребезне кире какмаганнары өчен дә без "Зәкәт" хәйрия фондына рәхмәтле".

Гөлнара Хәмидуллина ялгызы гына авыру улы Сәетне тәрбияли. Бала церебраль параличтан һәм эпилепсиядән интегә. "Зәкәт" фонды ярдәме белән үткән ел улым йөри башлады! Тернәкләнү курсын уңышлы үткәннән соң, ул аягында нык басып тора ала", - дип, тәэсирләре белән уртаклашты Гөлнара.

Ирек хәзрәт Җиһаншин сүзләренчә, физик мөмкинлекләре чикләнгән кешеләр турында кайгырту – Аллаһ тарафыннан бөтенебезгә дә йөкләнгән бурыч.

- Көчсез һәм мохтаҗларның социаль яклауга булган хокуклары ислам динендә ап-ачык күрсәтелгән, - ди фонд җитәкчесе. – Инвалидлык – ул бары тик тән халәте генә. Ул - кешенең ныклыгын һәм түземлеген сынау. Пәйгамбәр Мөхәммәд салляЛлаһу галәйһиссәлам: “Кайгы-хәсрәтнең күләме җибәрелгән бүләк зурлыгы белән тиң”, - дип әйткән. Ягъни Аллаһ Тәгалә үзе яраткан колларын сыный.

Бүген таратылган азык-төлек җыелмасына он, шикәр, чәй, токмач, дөге, карабодай һәм ясмык (чечевица) керде. Изге Рамазан ае ахырына кадәр “Зәкәт” хәйрия фонды мохтаҗларга, күпбалалы һәм азкеремле гаиләләргә, авыруларга тагын 100ләп шундый күчтәнәч өләшәчәк.

Мәгълүмат ТР мөселманнары Диния нәзарәте рәсми сайтыннан алынды.