Татарстан Эчке эшләр министрының чакыруы буенча Илдар хәзрәт Баязитов бәйрәм чараларында катнашты

Татарстан Эчке эшләр министры Артем Хохоринның чакыруы буенча “Ярдәм” мәчете имам-хатибы, Эчке эшләр министрлыгы каршындагы Иҗтимагый Совет әгъзасы Илдар хәзрәт Баязитов 10 ноябрьдә Россия Федерациясе эчке эшләр органы хезмәткәрләре Көненә багышланган бәйрәм чараларында катнашты.

Әлеге чара Эчке эшләр министрлыгы традицияләре нигезендә, ягъни ЭЭМ җитәкчеләре министрлыкның элекке башлыклары җирләнгән урынга, шулай ук хезмәт вазифаларын башкарганда һәлак булганнарны Искә алу диварына (ул Татарстан ЭЭМның Мемориаль-культ комплексында урнашкан) чәчәкләр салу белән башланды.

Аннары Татарстан ЭЭМ аппараты бүлекләре җитәкчеләре, Эчке эшләр министрлыгы органнары ветераннары һәм хезмәткәрләре, мактаулы кунаклар, ЭЭМ каршындагы Иҗтимагый Совет әгъзалары «Пирамида” мәдәният-күңел ачу үзәгенә җыелдылар.

“Пирамида”га керү ишеге янында кунакларны Татарстанның атказанган артисты Марат Кадыйров җитәкчелегендәге Татарстан ЭЭМның Мәдәни үзәге тынлы оркестры каршылады.
Тантаналы чараларда Татарстан Президенты Рөстәм Миңнеханов, республиканың баш федераль инспекторы Ренат Тимерҗанов, Казан мэры Илсур Метшин, Татарстан эчке эшләр министры Артем Хохорин, шулай ук башка ведомство җитәкчеләре катнашты.

Президент Рөстәм Миңнеханов үзенең бәйрәм котлавында республика үсешендә һәм тотрыклылыкны саклауда полициянең мөһим роль уйнавын билгеләп узды. “Вакытлар узу белән ил, җәмгыять үзгәрә, шулай ук полиция дә үзгәреш кичерә. Сезнең хезмәтегез эчтәлеге – гражданнарның хокукын, иреген һәм законлы мәнфәгатьләрен саклау гына үзгәрешсез кала”,-дип билгеләп үтте Илбашы.

Татарстан Президенты республиканың барлык полиция хезмәткәрләренә вазифа башкаруда уңышлар, гаилә җылысы һәм саулык-сәламәтлек теләде.