Татар яшьләре форумында “Иман йорты”н тәкъдим иттеләр

Татар яшьләренең VI Бөтендөнья форумында Татарстан башкаласының “Ярдәм” мәчетендәге “Иман йорты” тәкъдим ителде.

Әлеге форумда 25 чит илдән, Россиянең 44 төбәгеннән һәм Татарстаннан барлыгы 600 делегат катнашты.

Делегатларга “Иман йорты” клубын “Ярдәм” мәчете имамы Рамил хәзрәт Ибраһимов тәкъдим итте.

Рамил хәзрәт “Иман йорты”ның проектлары турында сөйләде һәм “Ярдәм” мәчетенең социаль сәясәтен Татарстан төбәкләрендә якларга чакырды.

“Иман йорты” клубы үзенең эшчәнлеген берничә юнәлештә алып бара: болар - “Ярдәм” мәчетендәге очрашулар, “түгәрәк өстәлләр”, “Рәйхан” кафесындагы аралашулар, 10-14 яшьлек кызлар өчен “Яшь мөслимәләр клубы”, “Яшь мөселманнарның “Батыр” клубы, 18-30 яшьтәге кызларның “Мөслимәләр клубы”.

Шулай ук бу клуб әһелләре җитәкчелегендә “Гаилә бәйрәме”, “Ураза бәйрәме”, кул эшләренең “Энҗе” фестивале, “Хәләл бәйрәм”, “Велокросс” һәм башка гомумшәһәр чаралары уза.

"Ярдәм" мәчете матбугат хезмәте