“Тарих эзләреннән” дип аталган Бөтенроссия Рәсемнәр бәйгесе нәтиҗәләре билгеле булды

"Идел” яшьләр үзәге "Тарих эзләреннән” дип аталган Бөтенроссия Рәсемнәр бәйгесе нәтиҗәләрен игълан итте. Кече төркемдә – Удмуртия Республикасыннан Гөлназ Гафурова, урта төркемдә – Казаннан Полина Спиридонова, тагын да өлкәнрәкләр арасында Ульяновск өлкәсеннән Альбина Гафиуллова җиңү яулады. Икенче һәм өченче урыннардан тыш, бер төркем балалар кызыксындыру бүләгенә лаек булды.

Татарстан Республикасы Яшьләр эшләре, спорт һәм туризм министрлыгы, "Идел” яшьләр үзәге оештырган бәйгенең максаты - Россия тарихы контекстында татар халкы тарихын өйрәнү дәрәҗәсен арттыру, үсеп килүче буында милли үзаң тәрбияләү, балаларны иҗатка якынайту. Ул Россия Федерациясе төбәкләрендәге талантлы балаларны барлау һәм аларга ярдәм итү; балаларның һәм үсмерләрнең игътибарын татар халкы тарихына юнәлтү; иҗатта үз-үзләрен күрсәтү өчен шартлар тудыру; балаларның иҗатын үстерүгә ярдәм итү; милли мәдәниятне һәм гореф-гадәтләрне популярлаштыру һәм пропагандалау бурычын куя.

Әлеге бәйгедә Россия Федерациясе төбәкләреннән булган, үз төбәкләре милли тормышында активлык күрсәткән, төбәкләрдәге милли-мәдәни мөхтәриятләрдә һәм татар иҗтимагый үзәкләрендә иҗат белән шөгыльләнүче 7-16 яшьлек балалар катнаша ала. Бу хакта "Идел” яшьләр үзәгендә хәбәр иттеләр.
Чыганак: "Татар-информ"