«Сөләйман»ның уңышлы эшләве имамның анасы Сания ханымга барып тоташа

Милади Яңа елның беренче көнендә Казандагы «Рәйхан» кафесында «Сөләйман» мәчетенең имам-хатибы Илдар хәзрәт Баязитовның әнисе Сания ханымга 77 яшь тулу вакыйгасы билгеләп үтелде. Туган көн мәҗлесе Әкрам абый Җәләлевнең Коръән укуы белән башланып китте.

БӘЙЛЕ
2013 Янв 04
Милади Яңа елның беренче көнендә Казандагы «Рәйхан» кафесында «Сөләйман» мәчетенең имам-хатибы Илдар хәзрәт Баязитовның әнисе Сания ханымга 77 яшь тулу вакыйгасы билгеләп үтелде. Туган көн мәҗлесе Әкрам абый Җәләлевнең Коръән укуы белән башланып китте. Бу көнне Сания ханымны балалары Илдар хәзрәт, Мәликә һәм Земфира ханымнар, күп санлы оныклары, "Сөләйман” мәчете мәхәлләсе халкы, Татарстанның атказанган артистлары Ренат Вәлиев, Рамил Миңнегалиев, Илһам Шакиров исемендәге Халыкара җыр бәйгесе лауреаты Равил Усманов һәм башкалар котлады.

 
1936 елның 1 гыйнварында Татарстанның Чирмешән районындагы Лашман авылында яшәүче Шәрәфетдин һәм остазбикә Фатима Миңнекәевләр гаиләсендә дөньяга килгән Саниягә тәкъдире шактый ук катлаулы язмыш әзерләп куйган икән. Аларның әтисе Шәрәфетдин сугышның беренче көннәрендә үк армиягә алына һәм озак та үтми, яу кырында ятып кала. Ятимә Саниягә балачактан ук Үзбәкстанның Термез каласына килеп сыенырга туры килә. Ул шунда үсә һәм педагогия көллиятен тәмамлагач, 40 елдан артык балалар укыта. Рифкать Баязитов дигән кешегә кияүгә чыгып, 5 бала үстерә. Әмма алда аларны ике олы кайгы-хәсрәт сагалап торган икән: көтмәгәндә, уйламаганда, Сания ханымның ике улы һәлак була.


"Рәйхан”дагы мәҗлес вакытында Сания ханымның авырлыклар алдында сынып, сыгылып төшмәве, аларны батырларча кичерүе турында да әйтелеп үтте. Ул кешеләрдә гаделлек, тыйнаклык, намуслылык, алдамау кебек сыйфатларны ярата икән. Шул ук вакытта ялганчыларны, хәйләкәрләрне сөйми. Адәм балаларында диндарлыкны күрергә тели. Яраткан саны – 7. Ул балаларын да кечкенәдән үк дингә өндәгән, аларны тәкъва итеп тәрбияләгән.


Әллә инде күп еллар буена дәфтәрләр тикшергәнгәме, әллә балалары, ире Рифкатьнең вафат булу кайгысыннанмы, бер мәлне Сания ханымның күзләре начарая башлый. Улы Илдар хәзрәт аңа эре хәрефләр белән басылган Коръән китабын алып кайта. Шул көннән Сания ханым өчен, әйтерсең, башка тормыш башлана. Шулчагында үзе белән бер хикмәтнең башлануын тоя ул: изге китапны укыган саен күзләре ачыла баруын сизә. Сания апа Коръәнне берничә тапкыр хәтем кыла, ягъни аны тулысынча укып чыга. Бүгенге көндә аның күзләре гадәти хәрефләр белән нәшер ителгән Коръәнне дә укый ала икән. Тәкъвалыгы өчен Аллаһы Тәгаләнең могҗизасы димичә ни диясең тагын бу хәлне?!
"Рәйхан” кафесындагы мәҗлес вакытында Сания ханымның адресына күп кенә мактау һәм рәхмәт сүзләре әйтелде, аңа бүләкләр тапшырылды. Ә иң зур бүләк балаларының аңа: "Әни, без сине бик яратабыз”,-дип әйткән сүзләре булгандыр, мөгаен.

 
"Сөләйман” мәчетенең имам-хатибы Илдар хәзрәт Баязитов әнисенә үзенең җылы хисләрен: "Кадерле әниебез. Син шуны бел: без сине бик яратабыз, сине нык хөрмәт итәбез. Беренче мәртәбә хаҗга барып, Кәгъбәтуллаһ тирәсендә йөргәндә, киләсе хаҗны әнием белән кыласы иде дип дога кылдым. Догамны Хак Тәгалә кабул кылган, күрәсең. Миңа әнием белән бергәләп хаҗ гамәлен кылу һәм барлык авырлыкларны кичереп, исән-имин әйләнеп кайту насыйп булды. Әни, киләчәктә дә сәламәт һәм имин бул, сиңа озын гомер телибез. Син яныбызда булганда, уңышларыбызга куанып, безгә догалар кылып торганда, безнең көчебез – куәтебез арта. Динебезгә мәхәббәтле шундый әниебез булганга, мин үземне бик бәхетле саныйм”,-дип белдерде.


Ә мин исә профессиональ артистларның, үзебезнең һәвәскәр, кем әйтмешли, атказанган җырчыбыз – азанчыбыз Миңлеәхәт Минҗановның моңлы көйләрен, мөселман кардәшләрнең ихластан сөйләгән чыгышларын тыңлаганда, Казандагы "Сөләйман” мәчетенең даны бөтен Россия күләмендә таралуында Сания ханым Баязитованың да өлеше бар, бәлки алай гына да түгелдер, казанышыбыз турыдан-туры Сания Шәрәфетдин кызына барып тоташадыр, дип уйлап утырдым.


Хатыйп ГӘРӘЙ
Автор фотолары

Комментарийны калдырыгыз
avatar

Авг 13
Авг 08
Авг 02
Июл 16
Июл 03
Июн 27
Май 22
Май 18
Май 17
Май 14
Май 14
Май 07
Май 01
Апр 19
Апр 12
Апр 11
Фев 14
Фев 05
Янв 15
Дек 26

40 тартма
Дин
Мәкаләләр


Вакыйга

Май 07

Май 10

Фев 09

Янв 11

Янв 06

Әңгәмәләр
© 2009-2021 "Татар Ислам" мәгълүмат агентлыгы
Сайтка куелган язмаларга барлык хокуклар «Ислам info» медиа-төркеменә карый. Материаллардан файдаланганда гиперсылтама ясау мәҗбүри. Массакүләм мәгълүмат чарасын теркәү турындагы таныклыгы: ИА № ФС-77-45782 13. 07 2011 ел. Элемтә, мәгълүмати технологияләр һәм массакүләм коммуникацияләр өлкәсендә күзәтчелек буенча федераль хезмәт (Роскомнадзор) тарафыннан бирелгән. Урнаштырылган материал 18+. т.8 927 242 35 78
Сайтлар ясау һәм сайт белән идарә итү — «Ариф» студиясе