Россиянең хоккей җыелма командасы Сочидагы Олимпиаданы Словенияне тар-мар итүдән башлады

Кичә Олимпиададагы тәүге уенны Россиянең баш тренеры Зиннәтулла Биләлетдинов хоккейчылары Словения командасын 5:2 исәбенә отудан башлады.

Словения Олимпиадада артык абруйлы команда булып исәпләнми. Аларның бары баш тренер улы Анжей Копитар гына АКШ тагы Милли Хоккей Лигасы (МХЛ) вәкиле булып тора. Ә Россия командасында дөнья дәрәҗәсендәге йолдызлар шактый күп.

Кичәге тәүге уенга шулай ук Казанның "Ак Барс” клубы хоккейчылары Илья Никулин, Евгений Медведев, Алексей Терещенко да чыкты. «Барс»ларның тагын бер һөҗүмчесе Александр Свитов исә запас уенчылар урындыгында утырды.
Уенның башы Россия хоккейчылары өчен күңелле башланды. Инде 2 нче минут барганда ук МХЛ йолдызы Александр Овечкин каршы як капкасына алканы ташлау бәхетенә иреште. Беренче алкадан соң, ике минут вакыт узмагандыр, Евгений Малкин икенче алканы Роберт Кристиан саклый торган капкага ташлады.

Аннары 3 период дәвамында исәп 5:2 булды. Калган вакытта ике команда да тизлекне киметте, ирешелгәннәр белән канәгатьләнергә уйладылар булса кирәк.

Россиялеләр киләсе очрашуны АКШ командасы белән иртәгә үткәрә. АКШ кичә Словакияне тагын да зуррак исәп - 7:1 белән тар-мар итте.