ММЧ: Тикшерү комитеты Немцовны үтерүне оештырган кешене ачыклады

“Коммерсантъ” газетасыннан алынган мәгълүматларга караганда, үзен Руслик дип таныштырган зат Немцовны үтерүне оештырган булырга мөмкин. Заур Дадаевның күрсәтмәләре буенча, нәкъ шушы кеше җинаятьтә катнашучыларны коралландырган һәм аларга шактый күп күләмдә акча бирергә вәгъдә иткән.

Газета хәбәрчесе белән сөйләшкән кеше Тикшеренү комитетына бу Русликның чын исеме һәм фамилиясе билгеле булуын әйткән. Тик тикшерүчеләр аның исемен әлегә сер итеп саклыйлар. Шунысы гына билгеле: ул җинаятьтә катнашучыларның якташы икән (монысын каян белгәннәр диген?). Газетадагы хәбәрдән күренгәнчә, бу кеше әлегә эзәрләүгә бирелмәгән. Ник дигәндә, тикшерүчеләр аның бу җинаятьтә катнашырга мөмкин булуы турында башка дәлилләр дә җыялар икән.

Дадаевның сөйләвенә караганда, җинаять кылуда аңа Руслик кушаматлы Чечня кешесе булышкан, ул аңа ПМ пистолетын да биргән.

Аннары, җинаять кылынгач, янәсе бу кешедән (Русликтан) килгән адәм әлеге пистолетны алып киткән. Дадаев Руслик белән Мәскәүдәге бер сәүдә үзәгендә танышкан. Ул аларга 5 әр миллион сум акча бирергә вәгъдә иткән.

Хәзерге вакытта Немцовны үтерү эше буенча 5 кеше гаепләнә. Болар – Заур Дадаев, Тамерлан Эскерханов, Рәмзәт Бахаев, Анзор һәм Шәдид Губашевлар.