Мөхәммәдсәлам Мөхәммәдов белән Әсхәт Сәфәров “Ярдәм” мәчетен карап киттеләр

Россия Президенты администрациясе җитәкчесе урынбасары Мөхәммәдсәлам Мөхәммәдов белән Татарстан Президенты аппараты җитәкчесе Әсхәт Сәфәров Казан каласындагы “Ярдәм” Күрмәүчеләрне тернәкләндерү үзәгендә булдылар.

Кунакларны “Ярдәм” мәчете имам-хатибы, “Ярдәм” Ислам милли хәйрия фонды рәисе Илдар хәзрәт Баязитов каршы алды һәм аларны мондагы үзәкнең эше белән таныштырды.

Мөхәммәдсәлам Мөхәммәдов һәм Әсхәт Сәфәров Күрмәүчеләрне укыту-тернәкләндерү үзәгендәге укыту классларын, кабинетларны, китапханәне, компьютер бүлмәсен карадылар.

Россия Президенты администрациясе җитәкчесе урынбасары Мөхәммәдсәлам Мөхәммәдов күрмәүче мөселманнарның бердәнбер үзәгендә алып барылган эшләргә югары бәя бирде һәм социаль хезмәт өчен Илдар хәзрәт Баязитовка рәхмәт белдерде. Мөхәммәдсәлам Мөхәммәдов “Ярдәм” мәчетенең уникаль булуын билгеләп узды һәм аның эшен федераль дәрәҗәдә күрсәтергә кирәк дигән киңәш бирде.

Татарстан Президенты аппараты җитәкчесе Әсхәт Сәфәров шулай ук Илдар хәзрәткә рәхмәт әйтте, “Ярдәм” мәчетенең Татарстан горурлыгы булуы хакында белдерде.

Очрашу ахырында Илдар хәзрәт Баязитов кунакларга үзенең “Традицион ислам: торгынлыктан чыгу юллары”, “Исламда социаль хезмәт” дигән китапларын бүләк итте.

“Ярдәм” мәчете каршындагы күрмәүчеләрне укыту-тернәкләндерү үзәге Казанда 2013 елның 19 июлендә ачылган иде. Бу комплекста гыйбадәтханәсе булган мәчет, чит төбәкләрдән килүчеләргә тулай торак, ашханә, уку класслары, китапханә, мини-типография бар. Күрмәүчеләр һәм азрак күрүчеләр укыту-тернәкләндерү үзәгендә Луи Брайль системасын, компьютер белеменә, төрле һөнәрләргә өйрәнәләр.

“Ярдәм” мәчете матбугат хезмәте