Мөфти Камил хәзрәт Сәмигуллин күренекле дин әһеле Әхмәтзәки хәзрәт Сафиуллинның туган авылында булды

Кичә Татарстан мөфтие Камил хәзрәт Сәмигуллин Нурлат районының Колбай-Мораса авылында булды. Биредә дин юлында гомере буе армый-талмый хезмәт иткән, 1920 еллар башында әлеге авылда имамлык иткән мөхтәрәм Әхмәтзәки хәзрәт Сафиуллинның шәхси әйберләре саклана.

Мөфти Камил хәзрәт Әхмәтзәки хәзрәтнең мирасын аның шәкерте, Россия мөселманнарының Үзәк Диния нәзарәте рәисе Шәйхелислам Тәлгать Таҗетдин белән бергә барлады. Дин әһелләре инкыйлабка кадәр басылган, остазның шәхси архивында сакланган Ибне Гарәбинең “Мәҗмүгер расаил” (дини эчтәлектәге мәкаләләр тыентыгы), Мөхәммәд Сабир Ибраһимның “Дини кануннар җыентыгы”н, татар халкында киң таралган башка эчтәлектәге китаплар белән танышты. Әхмәтзаки хәзрәтнең тормыш юлын сурәтләгән экспонатларны, аңа багышланган хезмәтләрне карады һәм рухи мирасны үстерү хакында да фикер алышты.

Шунысы мөһим: Әхмәтзәки хәзрәт Сафиуллинның эшчәнлеген өйрәнү, аны киң катлам укучыга җиткерү дәвам итә. "Татар дин галимнәре елы" кысаларында хәзрәткә багышланган истәлекләр, хатирәләр, мәкаләләр, аның вәгазьләре тупланган китап нәшер ителде, күптән түгел Каюм Насыйри музее хезмәткәрләре һәм Апанай мәчете тырышлыгы белән остазны искә алу кичәсе оештырылды дип хәбәр итте нәзарәтнең матбугат хезмәте.