Мөфти Камил хәзрәт Сәмигуллин "Ярдәм" тернәкләндерү үзәгендә булды

18 октябрьдә Татарстан мөфтие Камил хәзрәт Сәмигуллин “Ярдәм” күрмәүчеләрне тернәкләндерү үзәгендә булды. Биредә ул шәкертләрнең яңа төркеме белән очрашты.

Мөфти дини гыйлем алырга килгән күзләре начар күрүчеләр белән аралашканнан соң, социаль эшләр буенча җаваплы урынбасары, "Ярдәм" мәчете имам-хатыйбы Илдар хәзрәт Баязитов белән Теләче районындагы ятим инвалид балалар йорты хакында сөйләште.

Белгәнебезчә, ТҖ МДНндә узган елдагы Корбан бәйрәме көннәрендә әлеге йортны булдыру максатыннан, хәйрия телемарафоны уздырды. Хәйрия ярдәме белән Теләче районында ике бина алынды. Ел дәвамында күләмле оештыру эшләре башкарылды. Хәзер исә ремонт ясау, махсус медицина җиһазлары һәм автобус алу сорала.

“Корбан бәйрәмендә республикабызның барлык мәчетләрендә ятим балалар йортын булдыру максатыннан, сәдакаләр җыелды. Быел икенче мәртәбә үткәрелгән “Сөючеләр фида кыла” телемарафонында бик күпләр катнашып, үз өлешләрен кертте. Озакламый балалар йорты бинасы әзер булыр. Ул ятим һәм авыру балаларга сыену һәм тернәкләнү урыны булыр, Аллаһы боерса. Телемарафонда җыелган акчага быел инвалид балалар өчен махсус автобус сатып алыначак”, - дип ассызыклады мөфти Камил хәзрәт Сәмигуллин.

Чыганак: Диния нәзарәте матбугат хезмәте