Әлбир Крганов «Хәләл» дөньясындагы тикшеренүләр һәм мәгълүматлар үзәгенең эшен хуплады

Россия Үзәк Диния нәзарәте рәисенең беренче урынбасары, Россиянең Үзәк төбәге һәм Мәскәү мөфтие, Чувашия МДН рәисе, РФ Иҗтимагый палатасы әгъзасы Әлбир Крганов "Хәләл” дөньясындагы Ислам палатасының тикшеренүләр һәм мәгълүматлар үзәгенең эшен хуплады.
Шунысын билгеләп узу мәслихәт: "Хәләл” дөньясындагы бу үзәк (ICRIC) – РФдә хәләл ризыклар һәм хезмәтләргә сертификат бирү белән шөгыльләнүче халыкара оешма. Биредә тагын шуны әйтеп узарга кирәк: Россиянең Үзәк төбәге һәм Мәскәү мөфтияте каршында бу Үзәк белән берлектә "Хәләл” стандарты Комитеты да төзелә. Бу соңгысы исә ризыкларны үз теләгең белән Халыкара Хәләл (Halal) Системасына, ягъни ислам таләпләренә туры китереп сертификацияли башлаячак. Ул исә метрология һәм техник көйләү Федераль агентлыгында теркәлеп, эшен алып барачак (теркәлү саны: РОСС RU. 3909. 04ФДНО). Ризыкны үз теләгең белән сертификацияләү системасында җитештерүгә "Хәләл” стандартларын кертүгә зарури булган нигезләмәләр бар. Алар эчке базар үзенчәлекләрен исәпкә алып, җитештерүченең халыкара абруен күтәрү һәм аның продукциясен экспортка чыгару өчен дә бик мөһим. Димәк, бу Үзәктә сертификация алучы оешмаларга чит ил һәм үз базарларыбызда ризыкларын сату өчен киң мөмкинлекләр ачыла. Шунысын билгеләп узыйк: әлеге Комитет тиз арада үзенең эшен башлап җибәрәчәк һәм беренче эш итеп, Россиянең Үзәк төбәге, Мәскәү предприятиеләре ризыкларын сертификацияләргә керешәчәк.