Казандагы РИУ ректоры Кыргызстан Президенты белән очрашты. Вакыйга. Татар-Ислам

2012 Май 02

Әлеге очрашу Кыргызстан башлыгы резиденциясендә барлыкка килде.
Аның барышында РИУ ректоры Рәфыйк Мөхәммәтшин Президент Алмазбәк Атамбаевка Татарстан башкаласында әле күптән түгел яңадан басылып чыккан Коръәннең атаклы "Казан басмасы”н бүләк итте.

Рәхмәт әйтеп бу кадерле бүләкне кабул иткәннән соң, Атамбаев үзенең әти-әнисендә "Казан басмасы”ның булуы, әмма советлар заманында аны сакларга туры килгәнлектән, чит кешеләрнең игътибарын җәлеп итмәс өчен Никита Хрущевның китабы тышлыгы эченә салып торулары турында сөйләде.
Кыргызстан Президенты инде күптән Татарстанга барырга хыялланганлыгы турында да әйтеп узды. Ник дигәндә, хатыны татар, алар аның тарихи ватанына барырга ниятлиләр дип хәбәр итте РИУның матбугат хезмәте әһелләре.
Очрашу барышында Алмазбәк Атамбаев Казандагы РИУ хезмәткәрләре белән Кыргызстан өчен дини кадрлар әзерләүдә тыгыз элемтә булдырырга җыенулары хакында белдерде. "Без Татарстанга зур өметләр баглыйбыз. Татарлар һәрвакытта да барлык төрки халыклардан алда бардылар һәм хәзер дә без Казан белән хезмәттәшлек итәргә телибез”,-диде Кыргызстан Президенты. А. Атамбаев Кыргызстанда да Россиядәге кебек, Ислам мәдәниятен яклау фонды төзергә ниятләүләре хакында белдерде. Шулай ук бу илнең җитәкчелеге илаһият белеменә кагылышлы дәүләт стандарты барлыкка китерергә теләве турында әйтте.