"Ярдәм» мәчетендә «Энҗе» дигән кул эшләре бәйгесе булып узды

Узган шимбәдә «Иман йорты» яшьләр үзәге Казандагы “Ярдәм” мәчетендә ТҖ МДНнең “Зәкят” фонды хезмәткәрләре булышлыгында “Энҗе” дигән республика бәйгесен үткәрде.

Биредәге күргәзмәгә төрле кул эшләнмәләре куелган иде. Анда тегелгән һәм бәйләнгән әйберләрдән алып, чәчәкләргә һәм имзалары төшерелгән агач сувенирларга хәтле бар иде. Экспозицияләрне карарга килүчеләр “Ярдәм” Тернәкләндерү үзәгендә белем алучы күрмәүче мөселманнарның да эшләрен күрде.

Бәйге-конкурсның төп максаты – татар халкының гамәли сәнгатен саклау һәм үстерүгә өлеш кертү, дип билгеләп узды “Иман йорты” җитәкчесе Ләйсән Солтанова.

Бәйгедә катнашучыларның эшләрен тарихчы Тәэминә Биктимерова, журналист Земфира Гыйльметдинова, «Тренд» яшьләр үзәге җитәкчесе Ринат Нуриев бәяләде.

Жюриның бәяләмәсеннән чыгып, 1 нче урынга Линда Габдерәшитова лаек, дип табылды. 2 нче урында – Резеда Әгълиуллова, 3 нчедә – Эльза Сәгъдиева һәм “Апрель», «Здравушка” тернәкләндерү үзәкләре, 4 нче урында – Алсу һәм Гадилә Сәфәрова.

Конкурсның “Гран-при” бүләге исә Гөлназ Садыйровага тапшырылды.

“Ярдәм” мәчете матбугат хезмәте