“Иске Казанда - милли моңнар” хәйрия фестивале була

20 августта сәгать 14.00 дә Биектау районы Камай авылында урнашкан “Иске Казан” музей-тыюлыгында “Иске Казанда - милли моңнар” хәйрия фестивале була.

Бер төркем татар эстрадасы җырчылары ДЦП, яман шеш белән авыручы балаларга ярдәм итү һәм тарихи әһәмияткә ия булган “Иске Казан” музей-тыюлыгын халыкка таныту проектында катнаша. Чара икенче тапкыр оештырыла.

Катнашучылар арасында 30 га якын татар җырчысы бар. Болар: Илнар Ялалов, Илшат Вәлиев, Илназ Гарипов, Гөлнара Габидуллина, Нурзадә, Зәринә Хәсәншина, Эльмира Сөләйманова, Данир Сабиров, Марсель Вәгыйзов, Энҗе Шәймурзина, Рәсим Низамов, Мөнир Рахмаев, Азат һәм Алсу Фазлыевлар, ИлСаф, Резедә Шәрәфиева, Чәчкә, Гүзәлия, Дилә Нигъмәтуллина, “Сорнай” ансамбле һ.б.

Фестиваль барышында “Иске Казан” комплексы буенча экскурсия, кызыклы уеннар, ярминкәләр уздыру да каралган. Ярминкәдән кергән акча, шулай ук, хәйрия фондларына тапшырылачак. Моннан тыш, бәйрәмгә килгән кунакларны “Татмедиа” Республика матбугат һәм массакүләм коммуникацияләр агентлыгының “Сабантуй”, “Ялкын”, “Гаилә һәм мәктәп” журналлары вәкилләре татар матбугаты белән таныштырачак, уеннар уйнатып, бүләкләр тапшыру да күздә тотыла.

Проектның төп максаты һәм шигаре – “Ярдәм” һәм Анжела Вавилова исемендәге хәйрия фондлары булышуында дәваланучы авыру балаларны тернәкләндерүгә өлеш кертү. Аның авторы – журналист, җәмәгать эшлеклесе Рөстәм Исхакый, диелә Бөтендөнья татар конгрессы сайтында.
Чыганак: "Татар-информ"