Иң зирәк һәм тапкыр шәкертләр Казан Ислам көллиятендә укый

2014 Янв 25

Чара, гадәттәгечә, Коръән уку белән башланып китте. Конкурста катнашучыларны сәламләп, Казанның имам-мөхтәсибе, көллият директоры Мансур хәзрәт Җәләлетдин шәкертләргә уңышлар теләде.

"Бүгенгә сез әле шәкертләр генә. Вакыт үтәр, сез дә тиешле белем алып, мәчет-мәдрәсәләрдә эшли башларсыз. Көллияттә уздырылучы мондый чараларны киләчәктә үзегезнең мәхәлләләрегездә дә, шул җирлек мөселманнары арасында үткәрә аласыз. Менә шулай сез халыкка якынаясыз, яңадан-яңа талантларыгыз ачыла, оештыру сәләтегез камилләшә. Дини эшчәнлек белән бергә, бүгенгедәй дөньяви чараларда тагын да актив катнашу кирәк. Сез җәмгыятьтән, аның вакыйгаларыннан һәрвакыт хәбәрдар булырга, иҗтимагый эшләрдән читтә калмаска тиешсез”, - дип мөрәҗәгать итте ул үз шәкертләренә.

"Мусабакада”да катнашучыларга көллиятә укытылучы барлык фәннәрдән дә викторина сораулары тәкъдим ителде. Әйтик, ничә фәрештә бар һәм аларның исемнәрен әйтеп чыгарга. Ислам диненең 5 баганасы һәм аларның һәркайсына аңлатма. Сүз төркеме булган фигыльнең гарәп телендә төрләнеше. Берлек һәм күплек сан төшенчәләре, Пәйгамбәрләр тарихы һәм башка сораулар.

Конкурсның икенче өлешендә көллият студентлары дин, әдәп, әхлак, тәрбия темаларын яктырткан театральләштерелгән тамаша күрсәттеләр. Бу номинациядә "Әбүбәкер” командасы чыгышы аеруча үзенчәлекле итеп әзерләнгән иде. Моннан тыш, көллият студентлары дини уку йорты тормышын чагылдырган үзенчәлекле стена газеталары чыгарып, аны жюри хозурына чыгарды.

Командаларның ярышына нәтиҗәләр ясап, көллият директоры урынбасары Аймурат хәзрәт, җиңүчеләрне игълан итте. Барлык номинацияләрдә дә иң зирәк һәм тапкырлык күрсәтеп, 39 балл туплап, "Әбүбәкер” командасы 1 нче урынны яулады. "Госман” командасы шәкертләре исә алардан нибары бер баллга гына калышты. "Гомәр” һәм "Гали” командалары өченче һәм дүртенче урыннарны бүлеште.

Соңыннан җиңүчеләргә истәлекле бүләкләр тапшырылды. Студентлар исеменнән чыгыш ясаган 1 нче курс студенты Фәрит Сәмигуллин, мондый конкурсларның көллияттә генә түгел, ә үз тормышларында да истә калырлык бер вакыйга буларак билгеләп узды. ("Мусабака”- гарәп теленнән алынган сүз, бәйге, белемдә көч сынашу мәгънәсен аңлата.)