Галиәсгар Камал исемендәге театрда — “Хуҗа Насретдин”

6 февраль көнне кичке 7 дә Г.Камал исемендәге Татар дәүләт академия театры Нәкый Исәнбәт пьесасы һәм Сүрия драматургы Саадалла Ваннус әсәре буенча куелган “Хуҗа Насретдин” спектакленең премьерасын тәкъдим итә.

Спектакльне сәхнәгә театрның баш режиссеры Фәрит Бикчәнтәев куя. “Спектакль төрле каршылыклы фикерләр уятырга, гауга чыгарырга мөмкин”, - дип фаразлый театр тәнкыйтьчеләре.

Пьеса сугыш алдыннан, Сталин репрессияләре заманында, языла. “Бу әсәрдә, Исәнбәтнең күп кенә башка әсәрләрендәге кебек, яшерен мотивлар, автор табышмаклары ята. Алар еш кына әсәрнең төп эчтәлегеннән мөһимрәк була, бу очракта да, мөгаен, шулайдыр”, - ди театр тәнкыйтьчесе, Г. Камал театрының әдәби бүлеге мөдире Нияз Игъламов.

Беренче карашка, пьесаның эчтәлеге һәм акыл иясе, шамакай Хуҗа образы соцреализм шәкелендә хәл ителгән. Шулай да, монда төп мәгънә – авторитар режимны кабул итмәүдә, гражданлык ирегенең тыелуында, дип аңлата театрның матбугат хезмәте.

Спектакльне 6-8 һәм 27 февраль көннәрендә карарга мөмкин дип хәбәр итте "Татар-информ".