Фәрит Мифтахов татар-мөселман җәмәгатьчелеге өчен ифтар үткәрә

Татар конгрессының Казан бүлеге җитәкчесе, Дәүләт Советы депутаты Фәрит Мифтахов җомга көнне – 10 августта Ислам динен кабул итүгә 1000 ел исемендәге мәдрәсәгә татар җәмәгатьчелеген ифтар мәҗлесенә җыя.

Ифтар алдыннан җәмәгать, дәүләт, дин эшлеклеләре татар милләте өчен Рамазан аеның әһәмияте турында фикер алышачак. Аннан традицион исламны үстерүне төп бурыч итеп куйган “Ислам һәм татар” дөньясы концепциясе тикшерелә, аңа өстәмәләр, тәкъдимнәр кертеләчәк. Шулай ук Казан бүлегенең күпкырлы эшчәнлеге белән таныштыру булачак, дип хәбәр итә Казан оешмасы матбугат үзәге.

Фәрит Мифтахов оештырган ифтар ашында традиицион исламны үстерү турында сөйләшү Казан башлыгы Илсур Метшин чакыруына җавап булып тора. Мэр белдергәнчә, экстремизм һәм террорчылыкка каршы көрәшү өчен хакимият, депутатларның, матбугат чараларының, хокук саклаучыларның, җәмәгатьчелекнең берләшеп эш алып баруы кирәк.

- Казандагы татар-мөселман җәмәгатьчелеге Татарстанда традицион исламны үстерү һәм җәелдерүнең конкрет юлларын билгеләргә тиеш. Татар конгрессы традицион исламны кайтаруда төп көч була ала -, ди татар конгрессының Казан бүлеге җитәкчесе Фәрит Мифтахов.

Ифтар ашы 10 августта Ислам динен кабул итүгә 1000 ел исемендәге мәдрәсәдә (Мәҗит Гафури урамы, 67 нче йорт) узачак.

Тимер Сәгыйтов