Дин әһелләренең төп утырышы 9 июньдә Камал театрында булачак

8-9 июньдә татар дин әһелләре Казанга «Милли тормыш һәм дин» дип аталган форумга җыела. Өченче тапкыр үткәрелүче җыенда 55 төбәктән 945 кеше катнашу теләге белдерде, диде "Татмедиа” агентлыгында уздырылган матбугат очрашуында Бөтендөнья Татар Конгрессы башкарма комитеты рәисе Ринат Закиров.
Шулай ук ул җыен программасы белән дә таныштырды. Җыен кысаларында, 8 июньдә дүрт секциягә бүленеп эшләү каралган: Мәгълүмат кырында ислам ("Казан” милли мәдәни үзәге, Пушкин ур, 86), Ислам һәм мәгариф (КФУ, Татарстан ур, 2), Россия хәләл индустриясен үстерү проблемалары ("Мәрҗани" мәчете, К.Насыйри ур, 17), Мәчет, мәхәллә: оештыру проблемалары (ТР Фәннәр академиясе, Бауман ур, 20). 9 июньдә Камал театрында форумның пленар утырышы була. Ул сәгать 9.00 дә башлана. 10 июньдә төрле төбәкләрдән җыелган дин әһелләре "Изге Болгар җыены”нда катнаша. Ринат әфәнде сүзләренә караганда, республиканың кайбер районнарында халык 10 июньдә "Болгар җыены”на бара алсын өчен бу көнгә билгеләнгән Сабантуй бәйрәмен күчергәннәр.
Чыганак: "Думрт.ру"