Башкалабызда "Чәчәк ата торган Казан" чарасы дәвам итә

“Чәчәк ата торган Казан” акциясе кысаларында, башкаланың 36 урамы, скверы, паркларына 25 төрдәге 4 миллионлап чәчәк утыртылган. Чәчәк түтәлләренең гомуми мәйданы 35 мең кв. м. ны тәшкил итә. Бу хакта кичә “эшлекле дүшәмбе” киңәшмәсендә “Горводзеленхоз” МУП идарәчесе Роза Җәббарова хәбәр итте.

“Шәһәрне чәчәк белән бизәү өчен, быел трест теплицаларында 25 төрдәге барлыгы 4 миллионлап чәчәк үсентесе үстерелде. Үстентеләрнең 36 процентка арттырылуы “Чәчәк ата торган Казан” акциясенең үткәрелүе белән бәйле”, - дип ассызыклады Роза Җәббарова. Аның сүзләренә караганда, үз предприятиеләре җирлеген яшелләндерү максаты белән, компаниягә 45 шәхси оешма мөрәҗәгать иткән. Алар вазоннарга утыртылган чәчәкләр сатып алган. Нәтиҗәдә, 15 мең чәчәк һәм 250 вазон сатылган.

Роза Җәббарова, шулай ук, биеклеге 3 метрдан артык булган һәм 40 мең чәчәктән торган “Жар птица” чәчәк композициясен билгеләп узды. Шәһәребез үзәгендәге Эсперанто, Вишневский, Сәлимҗанов, Оренбург тракты, Болак урамнарында исә, 2 меңнән артык чәчәк кашпосы урнаштырылган.

“Горводзеленхоз” МУП идарәчесе сүзләренә карганда, утыртылган чәчәкләрне карау һәм вакытында су сибеп тору өчен, көн саен 150 эшче һәм 23 махсус техника берәмлеге җәлеп ителә. Моннан тыш, җәйгә 200 студент һәм мәктәп укучысы эшкә алынган.

Компания хәзерге вакытта “Яшел рекорд” кысаларында көзен агач утырту эшенә әзерлек алып бара. Бүгенге көндә трест питомнигында көзгә 10 меңнән артык агач һәм 15 мең куак әзерләнгән. Көзен Горький паркы территориясендә, Җиңү паркында, “Казан” Гаилә үзәге скверында һәм шәһәрнең башка урамнарында зур булып үсә торган агачлар утырту планлаштырыла дип хәбәр итте "Татар-информ".