АКШта күп кар яву сәбәпле, 8 кеше һәлак булган

Reuters агентлыгы хәбәр итүенчә, АКШның төньяк-көнчыгышында көчле кар яву сәбәпле, аз дигәндә 7 кеше һәлак булган.

Синоптиклар һәм гадәттән тыш хәлләр хезмәтләре кабат көчле кар яву дулкынын көтәләр. Фаразларга караганда, Бөек Диңгез районында 1 метр биеклеккә кадәр кар явуы ихтимал. Бу исә еллык норма дигән сүз.

Нью-Йорк штаты губернаторы Эндрю Куомо 10 округта гадәттән тыш хәлне игълан итте һәм анда яшәүчеләргә булышу максаты белән Милли гвардияне җәлеп итте.

Буффало каласы мэры Байрон Браун матбугат конференциясендә коммуналь хезмәтләр хәзерге вакытка 5 мең тонна карны шәһәрдән читкә чыгарулары турында хәбәр итте.

Ашыгыч ярдәм хезмәтләре кешеләргә булышу өчен карда йөрү техникасын куллана.

Һава торышының кискен үзгәрүе нәтиҗәсендә, ким дәгәндә, 7 кеше һәлак булган. Аерым алганда, 46 яшьлек ир заты 4,6 метр кар астында күмелгән килеш табылган, тагын ике кеше юл-транспорт фаҗигасында зыян күргән.

Өч кеше исә йөрәк өянәгеннән җан тәслим кылган, шулар арасыннан берәүнең хәле начаргач, үз вакытында медицина учреждениесенә алып бармаган өчен үлгән. Җиденче кешенең ничек һәлак булуы турында хәзергә төгәл мәгълүмат юк.

Соңгы сәгатьләрдә AFP АКШның бу төбәгендә тагын бер кешенең – сигезенче бәндәнең һәлак булуын хәбәр итте.