Татарстанда аерылышу бусагасында торган гаилә парлары өчен “Гаиләне саклап калыйк” программасы старт алды

Татарстанда аерылышу бусагасында торган гаилә парлары өчен яңадан торгызу медиациясе буенча “Гаиләне саклап калыйк” уникаль программасы старт алды. ТР Министрлар Кабинеты грантын алган перспективалы проект, Балалар һәм яшьләр эшләре буенча комитет каршындагы “Доверие” социаль хезмәт күрәтү буенча комплекслы үзәге белән берлектә, Казанның ЗАГС идарәсе инициативасы тарафыннан эшләнгән, дип хәбәр ителә ТР Министрлар Кабинетының ЗАГС идарәсе рәсми сайтында.

Проект аерылышуларны профилактикалау һәм гаиләне саклап калуга юнәлдерелгән.

Яңадан торгызу медиациясенең беренче очрашуына аерылышырга ниятләгән 7 пар килгән. Алар белән профессиональ психологлар – медиаторлар аралашкан. Әңгәмә процессында тоемланган беренчел тискәре кәеф, әкренләп, гаилә проблемасын конструктив хәл итү ягына таба үзгәргән.

Аннан ир белән хатын тагын бер дуслаштыру очрашуында катнашырга ризалык биргән. Нәтиҗәдә, алар бер-берсе белән сөйләшә башлаган, үзара мөнәсәбәтләре турында сүз кузгаткан.

Аерылышу стадиясендә булган гаилә парлары белән эш моның белән генә тәмамланмый. Гаилә парларына тагын бер ай вакыт бирелә. Бу арада алар психолог белән аралаша, шулай ук аерылышу нәтиҗәләре турында ЗАГС хезмәткәрләреннән кирәкле консультация ала.

Проектны оештыручылар ахыр чиктә ир белән хатын дөрес карар кылачагына ышана.
“Татар-информ”