Татарстан мөфтие Камил хәзрәт Сәмигуллин Чүпрәле, Апас районнарына хезмәти сәфәр кылды

18 ноябрдә Татарстан мөфтие Камил хәзрәт Сәмигуллин башта Чүпрәле мөхтәсибәтенә эшлекле сәфәр кылды.

Сәфәр Чүпрәле районы башлыгы Александр Валерьевич Шадриков белән очрашудан башланды. Аның барышында дин әһелләре җирле хакимият вәкилләре белән райондагы дини вәзгыять хакында, дини эшләр, имамнар турында фикерләште. Шулай ук Татарстан мөфтие Чүпрәле районы башлыгы Александр Шадриковка III Республикакүләм ифтарны оештыруга зур өлеш кертүе өчен рәхмәт белдерде.
Очрашуда шулай ук мөфти урынбасары Рөстәм хәзрәт Хәйруллин, имам-мөхтәсиб Рөстәм хәзрәт Рәкыйпов та катнашты, дип хәбәр итә ТР мөселманнары Диния нәзарәте матбугат хезмәте.
Чүпрәле районы башлыгы нәзарәт вәкилләре белән бергә Иске Чүпрәле авылындагы җәмигъ мәчет һәм мәдрәсә төзелешендә булды. Камил хәзрәт сәфәре кысаларында Чүпрәле районы имамнары белән очрашып, аларга Рәхмәт хатлары һәм имамлык вазыйфасы расламасы - шәһадәтнамәләр дә тапшырды.

Татарстан мөфтие Камил хәзрәт Сәмигуллин, Чүпрәледән соң, Апас районына эшлекле сәфәр кылды. Биредә ул җирлектәге имамнар, хакимият вәкилләре белән очрашулар уздырды. Әлеге очрашуларда мөфти урынбасары Рөстәм хәзрәт Хәйруллин һәм район имам-мөхтәсибе Мирхәт хәзрәт Җамалиев катнашты.
Имамнар белән аралашканда мөфти дин әһелләренең дини эшчәнлеккә кагылышлы сорауларына җавап бирде, традицион ислам үсешенә зур өлеш керткән өчен рәхмәтен җиткерде.

Шулай ук мөфти Апас районы башлыгы Рәшит Заһидуллинның III Республика ифтарын оештыруга зур өлеш керткәне өчен Рәхмәт хаты тапшырды.

“Татар-информ”