“Таян Аллага” әдәби конкурсына эшләр кабул ителә

Россия Федерациясендә яшәүче татар яшьләре арасында яшь талантларны барлау һәм берләштерү, аларның иҗади эшчәнлекләрен үстерү максатыннан, Татарстан Республикасы мөселманнары Диния нәзарәте, Россия ислам институты, Бөтендөнья татар конгрессы “Таян Аллага” әдәби конкурсын уздыра, диелә нәзарәт сайтында.

Конкурсның бурычлары: сәләтле яшьләргә иҗади үсеш өчен шартлар булдыру; татар телен, әдәбиятын, мәдәниятен һәм ислам динен пропагандалау.

Конкурс өч этапта үткәрелә:

I этап — әсәрләрне җыю (10 ноябрь 2015 ел – 31 гыйнвар 2016 ел)
II этап — әсәрләрне жюри тарафыннан бәяләү (1 февраль – 31 март 2016 ел).
III этап — җиңүчеләрне бүләкләү (май 2016 ел).

Конкурста Россия Федерациясендә яшәүче 14 яшьтән 35 яшькә кадәрге һәр теләгән кеше катнаша ала.

Конкурс иҗат эше белән профессиональ рәвештә шөгыльләнмәүче яшьләр өчен үткәрелә, профессиональ язучыларның, шагыйрьләрнең, журналистларның әсәрләре һәм язмалары кабул ителми.

Конкурс дүрт номинациядә бәяләнә:
- шигърият,
- чәчмә әсәрләр,
- драматургия,
- публицистика.

Тәкъдим ителгән әсәрләр һәм мәкаләләр татар телендә язылырга тиеш.

Аз күләмле әсәрләрне (шигырьләр, кыска хикәяләр һ.б.) һәм публицистик язмаларны кимендә өчне җибәрү сорала. Аларны түбәндәге таләпләргә туры китереп эшләргә кирәк: Times New Roman шрифтында, 14 нче кегль, бер ярым интервалда, сул яктан – 30 мм, уң яктан – 10 мм, өстән – 25 мм, астан – 20 мм.

Конкурска язмалар электрон вариантта кабул ителә. Түбәндәге электрон почтага: tatarkonkurs@mail.ru

Оештыру комитеты адресы: Казан ш., Газ урамы, 19 нчы йорт. Татар теле һәм милли мәдәният кафедрасы. E-mail: tatarkonkurs@mail.ru